Serbia, së bashku me Shqipërinë dhe Maqedoninë e Veriut kanë “kërcënuar” se, nuk do të marrin pjesë në samitin e Bashkimit Evropian, që do të mbahet nesër për t’i dhënë Ukrainës dhe Moldavisë statusin e vendit kandidat për në BE.
Megjithatë, sipas “Euractiv”, tre shtetet kanë deklaruar se do të njoftojnë të mërkurën (22 qershor) në mesditë, nëse do të marrin pjesë në samit apo jo.
“Nga gjashtë kandidatët e Ballkanit perëndimor, vetëm Mali i Zi dhe Serbia kanë hapur zyrtarisht negociatat e pranimit, ndërsa Shqipëria dhe Maqedonia e Veriut kanë qenë në dhomën e pritjes për disa vite. Sipas draft-përfundimeve të samitit, pritet që ata të komentojnë mosmarrëveshjen dypalëshe midis Maqedonisë së Veriut dhe Bullgarisë, e cila ka penguar përparimin e vendit në procesin e zgjerimit për atë që Sofja e sheh si politikë anti-bullgare në vendin fqinj, si dhe çështjet e identitetit”, shkruan Euractiv.
Kujtojmë se, kryeministri Edi Rama ka deklaruar, që Shqipëria do të ecë së bashku me Maqedoninë e Veriut në procesin e integrimit në BE, duke nënkuptuar dëshirën që vendet të mos ndahen në rast se Shkupi bllokohet sërish me veto nga Sofia.
