Karriera e nënkryetares së Gjykatës së Elbasanit është në rrezik për shkak të videove te publikuara në rrjetin social Tik Tok, të cilat Enkeleda Kapedani i ka realizuar në zyrën e punës dhe ambientet e institucionit të drejtësisë.
Inspektori i Lartë i Drejtësisë urdhëroi nisjen e një hetimi disiplinor për kryegjyqtaren në detyrë, e cila do të vijojë të firmosë vendime në emër të Republikës, derisa ky hetim të përfundojë.
Po kush është Enkeleda Kapedani?
Si mund ajo të ngjitej brenda një kohe të shkurtër në majat më të larta të karrierës, në pushtetin gjyqësor?
E shpallur “Miss Shqipëria” në konkursin e bukurisë në vitin 2003, Enkeleda Kapedani vendosi të studionte për Drejtësi.
Më pas përfundoi Shkollën e Magjistraturës, profil gjyqtar dhe pasi përfundoi stazhin nisi rrugëtimin e saj në sistemin e drejtësisë. Në vitin 2015, ajo u dekretua nga presidenti Bujar Nishani në detyrën e gjyqtares në Gjykatën e Elbasanit ku punon edhe aktualisht.
Përgjatë këtyre viteve, emri i Kapedanit bëri bujë në media kur firmosi lirimin me kusht të Viktor Imerit, të bandës së Gaxhait, por asokohe nuk pati reagime të forta institucionale.
Por ndërsa pritej të kontrollohej vendimmarrja e saj, zonja Kapedani u ngrit në detyrë. Në shtator 2020, mbledhja e gjyqtarëve e zgjodhi nënkryetare në detyrë.
Ajo pret të kalojë në filtrin e trefishtë të kontrollit, ndryshe testin e Vettingut, ku do t’i nënshtrohet kontrollit të pasurisë, figurës morale dhe aftësive profesionale.
Por hetimi disiplinor i nisur tashmë pas skandalit të videove në Tik Tok, e vendos në rrezik serioz karrierën e saj si gjyqtare.
LEXO EDHE:
Videot skandaloze, kryegjyqtarja: S’kam ‘Tik Tok’, skenar për prishje imazhi
