Nga Laert Miraku
Viti 1993 ishte i mbushur me arrestime të shumta të ish-funksionarëve të lartë politikë. Vala e arrestimeve të tjera, pasi kishin vënë pas hekurave vejushën e diktatorit, fillon me Vilson Ahmetin, kryeministrin e qeverisë teknike. Megjithëse në postin e kreut të ekzekutivit qëndroi shumë pak kohë, Ahmeti u arrestua për skandalin e 1.800.000 dollarëve. Disa muaj më vonë më 30 korrik 1993 u arrestua ish-kryeministri Fatos Nano. Në shtator të atij viti arrestohet dhe ish-presidenti Ramiz Alia. Më vonë të gjitha këto arrestime u konsideruan politike dhe të gjithë morën pafajësinë.
U bënë tri dekada që nuk kemi më arrestime të politikanëve me poste si ish-kryeministër apo ish-presidentë. Janë më pak të korruptuar apo politikanët sot kanë në dorën e tyre “edhe gurin edhe arrën” dhe e përdorin sistemin e drejtësisë si ua ka ënda. Marrëveshja duket e qartë, “po nuk më ngacmove nuk të ngacmoj”.
Ja çfarë shkruhej në gazetën “Koha Jonë”, më 20 shkurt 1993
Arrestohet ish kryeministri Vilson Ahmeti
Bëhet e ditur se ditën e Enjte, rreth orës 14 e 30, prokurori Shkëlqim Kokona dhe hetuesi Beqir Kokoshi vendosën të marrin si të pandehur Kryeministrin e Qeverisë teknike zotin Vilson Ahmeti.
Sipas burimeve hetuesi dhe prokurori shoqërohesh nga 10 policë të cilët bënë kontroll në shtëpinë e z. Ahmeti.
Siç dihet, hetuesi Kokoshi është ngarkuar me hetimin e çështjes së 1 milion e 600 mijë dollarëve që lidhen me borxhin e jashtëm shqiptar.
Qenia e z. Ahmeti si kryeministër përkon me caktimin e francezit Arsidi si ndërmjetës për borxhin e jashtëm.
Le te presim se çfarë do te dale pas ndali- mit të z. Vilson Ahmeti. I kujtojmë lexuesve se pas arrestimit të Agron Saliut dhe Agim Tartarit (Drejtori dhe nëndrejtori i Bankës tregtare) ky është arresti i tretë që lidhet me skandalin e 1.800.000 dollarëve.
