Pas ngjarjeve të rënda, si masakra e Velipojës ku u vranë 4 persona dhe u plagosën 2 të tjerë, si dhe pas aksidentit afër Vlorës, ku një mjet me shpejtësi mori jetën e një familje, është shfaqur sot në publik Ministri i Brendshëm, me një qendrim të shkruar, ku gjatë leximit pati jo pak ndalesa, çka tregon për asimilim jo të plotë të tekstit.
Ministri i Brendshëm bëri edhe ironi, kur tha se policia nuk ka se si ta dijë se kush drejton çdo automjet, apo të jetë aty kur grinden dy fqinjë në mesnatë.
Kritikat ndaj politicisë, i cilësoi si të zellshme.
Por jo vetëm kaq, Çuçi u shpreh se faji për shkelësit e ligjit është i prokurorisë dhe gjykatave, ku përmendi disa raste të ndaluarish nga policia që janë lënë më tej të lirë nga organet e drejtësisë.
Një déjà vu kjo, si me sulmet heroike që bënte Saimir Tahiri, duke telendisur me emër mbiemër prokurorë e gjyqtarë.
Sa i përket armëve që janë sheshit, i pyetur nga gazetarët, Çuçi e çoi edhe më tej fajin, duke bërë përgjegjës qeveritë e liderët e mëparshëm. Ai tha se ministria ska se sit a dijë se sa armë kanë njerëzit nëpër shpia.
Ministri i Brendshëm pohoi se policia po bën të pamundurën për të parandaluar përdorimin e armëve, por është gjyqësori problemi.
Por Çuçi garantoi publikun se në mandatin e tretë, qeveria do të bëjë reformat ë thella, siç është kontrolli i territorit me dron inteligjent.
