Ardhja e vaksinave në Shqipëri, sado në dozë të vogël, mbetet patjetër një lajm i mirë. I vetmi problem me to është se sa herë vijnë, ato të shkreta duhet të paguajnë një taskë të shtrenjtë, që është propaganda pa fre e kryeministrit dhe e qeverisë.
Vaksinat nuk e dinë se keqpërdoren kësisoj, të bekuarat s’kanë si ta dinë.
Po kjo po ndodh, aq sa duket se ato doza nuk mund të mbërrijnë, pa shfaqjen me pompë në Rinas.
Sado ta zmadhojë rilindja dhe bosi i saj, me parabolat mediatike, numri i tyre ngelet i pakët, i pamjaftueshëm.
Eshtë hera e tretë që Edi Rama mban konferenca të gjata shtypi para se avioni të prekë pistën, dhe pas.
Raporti është me të vërtetë i zhdrejtë. Një dozë vaksinë përzihet me 15 doza propagandë.
Për çfarë arsye në botë, duhet që kryeministri të dalë e të presë në aeroport disa kuti me vaksina, kur këtë mund dhe duhet ta bëjë Ministria e Shëndetësisë, përveçse për movitin ulëritës të shfrytëzimit të këtij momenti për fushatë.
Nuk kemi parë në asnjë vend të botës të ndodhë kjo.
Doli Vuçiç një herë në aeroportin e Beogradit, por po priste 1 milionë doza aty.
Kur del për një kuti, apo për 7 mijë ampula, a mund ta përfytyrojë dikush se çdo të kishte bërë Rama nëse do vinin një gjysëm milioni vaksina.
Eshtë thjesht e pabesueshme se si askush nuk mund t’i pëshpërisë në vesh kreut të qeverisë dhe ministreshes së tij, se janë bërë po aq të padurueshëm sa edhe pandemia.
Madje edhe më shumë, sepe janë të vetmit sot që pa asnjë droje, dalin çdo ditë për të përfituar nga situata.
E kanë mendjen tek votat dhe tek pushteti.
Duan në këtë krizë të madhe të nxjerrin bereqet elektoral, dhe këtë e ka marrë vesh i madh e i vogël, dhe sa më shumë vijojnë, aq më të rëndë do ta kenë bilancin e 25 prillit.
