Finalja e Champions League për këtë sezon do të luhet në Kiev të Ukrainës, por spektaklit të garantuar në fushën e gjelbërt në përballjen mes dy emrave gjigantë si Reali i Madridit dhe Liverpool, duket se nuk do t’i mungojë diçka shqiptare.
Në fakt, njoftimi zyrtar pritet të bëhet më 8 maj, kur të mësohen të gjitha detajet e ceremonisë hapëse të etapës së fundit të kompeticionit prestigjioz për klube në Europë, edhe pse për shqipfolësit andej e këtej kufirit nuk mbetet asgjë surprizë.
Dua Lipa, këngëtarja e famshme me origjinë nga Kosova do të jetë e ftuara e nderit të kësaj ceremonie, ku pritet të performojë disa nga hitet e saj më të ndjekura në botë.
Ka qenë vet UEFA, që përmes llogarisë zyrtare në Twitter fton ndjekësit të “zbulojnë” enigmën e personazhit të përfshirë në një videoklip të shkurtër, që mban kolonën zanore të hitit “New Rules” të Dua Lipës.
