Komisioni Qendror i Zgjedhjeve ka vendosur të shpallë “moszgjedhshmërinë” për kandidatin e PSD në Shkodër, Gledis Çeliku pas dorëheqjes nga mandati të Tom Doshit.
Në mbledhjen e zhvilluar sot, Kryekomisioneri Shtetëror i Zgjedhjeve, Ilirjan Celibashi njoftoi edhe për kalimin e mandatit të Bashkim Finos tek Gentiana Cakrani, por mori vendimin edhe për Shkodrën.
“Projektvendim “Për shpalljen e moszgjedhshmërisë të kandidatit të radhës në listën shumemërore të Partisë Socialdemokrate, Qarku Shkodër, z. Gledis Esat Çeliku, për plotësimin e vakancës së njoftuar nga Kuvendi i Shqipërisë”– thuhet në vendimin e KQZ.
Edhe pse Çeliku ishte emri i radhës që duhet të merrte mandatin e PSD në Shkodër, ai nuk ka dorëzuar formularin për dekriminalizimin duke u djegur automatikisht nga procesi.
Kodi Zgjedhor parashikonte dorëzimin e formularit të dekriminalizimit para datës 20 maj 2020.
Tashmë mandati i Doshit në Shkodër do t’i kalojë në bazë të ligjit kandidates Meri Markiçi, e renditur e treta në listën shumëemërore.
Ndërsa kundër vendimit, kandidati Gledis Çeliku ka tre ditë kohë për ankimim në KAS.
Etiketa: Gledis Çeliku, Lista e kandidateve, Shkodër, Tom Doshi, Zgjedhjet e 25 prillit
