Viti që u mbyll ishte për shqiptarët skenë e tre të këqijave që luajtën fort me jetën dhe me fatin e tyre.
Tërmeti, pandemia ishin aktorë të rinj, teksa keqqeverisja qe tashmë një zakon në motin e saj të shtatë.
Kalimi në vitin e ri 2021, nuk do me thënë se automatikisht u lanë pas këto tre të këqia.
Ndryshe do kishim të bënim me mrekulli.
Pasojat e tërmetit dhe të pandemisë janë ende nëpër këmbë, dhe të rënda madje, pikërisht prej keqqeverisjes.
Ndërsa pak kanë në dorë njerezit, nuk bëjnë punë lutjet apo enderrimet, qendrimet metafizike apo mesdhetare tipike, një gjë ata mund ta ndryshojnë.
Ajo është qeverisja.
Dhe përmes kësaj, të ndikojnë më pas në reduktimin e të këqijave të tjera, e pse jo në përmirësim të jetës.
Keqqeverisja ka një datë konkrete, një afat të prekshëm. Mund të ndalet më 25 prill.
Të gjitha shenjat janë që kjo do ndodhë.
Nëse njerëzit zgjidhin problemin më të madh, rruga hapet edhe për të tjera dalje nga kriza.
Në këtë kuptim asgjë e re nuk vjen vetiu prej kapërxyellit të viteve e ndërrimit kalendarik të faqes.
Risia e vetme do të lindë nga vota.
Në disa analiza sipërfaqësore kryesisht, shpesh nuk përfillet sa duhet revolta masive në shoqëri. Madje, injorohet ndoshta me kast, mbase nga verbimi që sjell pushteti, padurimi që kanë njerezit për ta shpallur zhgënjimin e lodhjen.
Nuk ka dyshim se kjo gjendje do të sjellë më së paku ndëshkimin e rilindjes.
Kjo do të jetë dhurata që qytetarët do t’i bëjnë vetes së tyre.
Po gjithaq, do të jetë një kujtesë, një zile për çdo qeveri tjetër. Askush të mos nanurisë endrra që mund të mbajë pushtet, privilegje e karrige, me forcë, me kapje të zyrave, me trysni, shantazh e blerje.
Me rënien e regjimit aktual, që shtrihet në çdo hapësirë ekzekutive, vendore, legjislative, mediatike dhe në drejtësi, shqiptarët do të japin leksionin e duhur për politikën e do të vendosin një gur kilometrik në lënien pas të tranzicionit e futjen në kohën e zhvillimit normal.
Etiketa: 2021, dhurata, qytetarët
