Edi Rama e ka trajtuar shpërthimin e revoltës pas vrasjes së 25 vjeçarit nga policia, si një zhvillim të vogël, si një kryengritje modeste, të cilën Veziri do të mund ta shtypte duke sakrifikuar ministrin Lleshaj, dhe sidomos, do ta shuante atë, me një fjalim.
Po pikërisht, teksa këto të dyja po ndodhnin, qindra protestues, të rinj kryesisht, shumë të rinj, vajza dhe gra, dhe familjarë, e bënë të ditur se kaq nuk mjafton.
Rama pati lajmëruar se do të kishte atë mesazhin e madh. Komunikimin me Shqipërinë siç e fryn ai me pompë, por që doli se ishte njëjta pjatë, e njëjta kim me vezë, që ai servir në publik prej kohësh.
Kryeministri ende mendon se ka forcën të mahnisë njerëzit me fjalë, teksa qytetarët që ka përballë, janë të udhëhequr nga një zemërim e indinjatë e grumbulluar në 7 vite prej keqqeverisjes, prej korrupsionit, padrejtësisë, dhe sidomos prej arrogancës dhe shpërfilljes që rilindja u ka bërë shqiptarëve.
Vetë Rama nuk e ka marrë kurrë në konsideratë mundësinë e një rrebelimi të këtillë. Ai ka bërë shpoti dhe është tallur, madje ka fyer njerëzit, me shprehje se popullit nuk i ngrihet.
Tani ai nuk ka më mundësi të ndalojë dallgën që është ngritur.
Sepse ai vetë, me skotën e servilëve, ka dy mandate që nuk qeveris me konsensus, e nuk e ka në defter pëlqimin apo jo të qytetarëve. Duke u sjellë në këtë mënyrë, rilindja ka tashmë në rrugë qindra e mijëra trupa të indijnuar e të kapluar nga zhgënjimi, nga stresi, nga humbja e shpresës dhe besimit, sa nuk ka gaz lotsjellës, apo skalione me forca speciale që mund t’i frenojë.
Këta protestues, e kanë bërë të qartë një herë e mirë, jo vetëm për Ramën që është në ikje, por për këdo që do të vijë në qeverisje, se; ndryshimi që duhet të vijë, lypset të jetë i madh, rrënjësor, dramatik.
Nuk mjafton fshirja e një ministri, apo fjala e një Kryeministri. Duhet tjetër kulturë qeverisje, duhet tjetër filozofi. Njerëzit duhen përfillur çdo ditë. Duhet pasur parasysh gjithnjë në mendje, e drejta e tyre për t’u ngritur, kur i nëpërkëmb.
Këto protesta, e kanë bërë tashmë këtë shërbim. Do të jenë një kujtesë e mirë për këdo që i duket vetja gjysëm perendi kur vjen në pushtet, dhe që bën me buxhetin çfarë ti teket, e shpërndan pasuritë e vendit si të ishin kungujt e kopshtit të tij.
