Janë lënë në burg mjekët që morën ryshfet për të operuar të riun Elmidin Dyli, i cili u plagos në masakrën e Velipojës, me 4 të vdekur.
Vendimi kundrejt mjekëve Ervin Sulaj dhe Serdi Memini si dhe infermieren Diellë Macaj, është dhënë nga Gjykata e Shkallës së Parë në Shkodër.
Nga ana tjetër, babait të të plagosurit, Fatbardh Dyli, i është dhënë masa e sigurisë “detyrim paraqitje”.
Serdi Memini dhe Ervin Sulaj ranë në prangat e policisë pasi dyshohet se kanë marrë para nga babai i nipit të Ferracakëve që po trajtohet në spital.
Mjeku Ervin Sulaj, i cili ishte në sallën e gjyqit, mohoi akuzën për marrje ryshfeti, duke deklaruar se ai dhe kolegu i tij janë marrë vetëm me operacionin e Elmidin Dylit.
Ndërsa masa për mjekun kirurg Serdi Memini u zhvillua në mungesë, pasi ai ndodhet i shtruar në Spitalin e Traumës në Tiranë për probleme shëndetësore.
Në pranga u vu edhe, Fatbardh Dyli babai i 17-vjeçarit hetimi ndaj të cilit do të vazhdojë në gjendje të lirë me kërkesë të Prokurorisë. Ai dyshohet se u dha mjekëve 377 mijë lekë dhe 55 euro, të cilat më pas janë sekuestruar në cilësinë e provës materiale.
Ndërkohë Gjykata e Shkodrës rrëzoi kërkesën e Prokurorisë së Shkodrës që dosja t’i kalojë SPAK për hetime të mëtejshme.