Opozita dhe maxhoranca janë ulur sot për të biseduar për presidentin e ri në Kryesinë e Kuvendit në prani të kamerave. Pritet që sot në tryezë të hidhen kandidatët e mundshëm për postin e kryetarit të shtetit.
Takimi i sotëm u dakordësua dje mes Enkelejd Alibeaj dhe grupit negociator socialist Taulant Balla, Damian Gjiknuri dhe Elisa Spiropali.
Në diskutimet për presidentin e ri të vendit, kreu i grupit parlamentar të PD, Enkelejd Alibeaj ka treguar se kanë marrë pjesë në këtë proces vetëm që të mos vinte raudni i katërt dhe i pestë e mazhoranca të bënte zgjedhjen duke fajësuar opozitën se braktisi procesin.
“Opozita mori pjesë në këtë proces për të mos krijuar alibi, arsye të paqena që pjesa tjetër e Kuvendit të shkojë në raundin e katërt dhe të pestë e të këndojnë “Ata s’erdhën, por e zgjedhim ne”. Kjo nuk do ti shërbente askujt, thjesht do ishte zgjatim i mazhorancës. Kjo është arsyeja pse kemi marrë pjesë në këtë proces. Pavarësisht ndryshimeve të 2008, thelbi mbetet, 3 raundet e para presidenti duhet të zgjidhet me jo më pak se 84 vota.
Ajo që sot konsiderohet mazhorancë nuk e ka legjitimitetin real, atë që buron nga zgjedhjet. Kriteret nuk janë ndonjë habi, përveç kritereve, legjislacioni përmbante një sërë kriteresh të tjera të shpërndara andej-këtej që i referohen institucioneve të tjera dhe ka ardhur e gjitha si nevojë për deformimin për të implementuar edhe për presidentin. Pjesa e dytë i përket procesit. Është legjitime, e justifikuar, shkon drejt frymës së kushtetutës. Në 3 raundet e para, e drejta për të propozuar t’i përkasë opozitës”, tha Alibeaj.
Ndërkohë, që raundi i parë dështoi pa asnjë emër të propozuar për votim, raundi i dytë për zgjedhjen e presidentit do të jetë në datë 23 maj ora 18:00.
