Sot në orën 10:00, opozita e bashkuar do të protestojë sërish, kësaj here para Parlamentit të Shqipërisë. Kjo protestë do të zhvillohet nën vazhdën e protestës së 16 shkurtit që u zhvillua para Kryeministrisë. Një ditë më parë kreu i PD-së, Lulzim Basha teksa firmosi djegien e mandatit të tij si deputet, ftoi edhe njëherë të gjithë shqiptarët të bashkohen në protestën e ditës së sotme para Kuvendit.
Edhe këtë herë janë nisur shumë protestues nga rrethet e tjera të Shqipërisë drejt Tiranës. Ndërkohë, po dje, Policia e Shtetit u bëri thirrje organizatorëve të protestës, që zhvillohet sot para Kuvendit, që të distancohen hapur nga dhuna dhe të bëjnë thirrje për respektimin e ligjit nga ana e protestuesve.
Në deklaratën zyrtare, lidhur me masat e marra për tubimin që do të zhvillohet nga opozita, Policia thotë se ka të dhëna se synohet hyrja me forcë në Kuvend, si dhe për nxitje dhune e organizime me natyrë kriminale.
Megjithatë, thotë se është tërësisht e angazhuar për të garantuar rendin dhe sigurinë publike, si dhe paprekshmërinë e institucioneve gjatë kohës së zhvillimit të protestës.
“Nga informacionet e mbledhura nga shërbimet përkatëse, ka të dhëna për nxitje të dhunës dhe organizime me natyrë kriminale. Synohet hyrja me forcë në sallën e Parlamentit, duke ushtruar dhunë mbi personelin që ka detyrimin ligjor të sigurojë mbrojtjen e institucionit themelor të demokracisë. Për të parandaluar çdo mundësi të tillë, Policia e Shtetit u bën apel, në radhë të parë, organizatorëve që të distancohen hapur nga dhuna dhe të bëjnë thirrje për respektimin e ligjit nga çdo protestues”- tha Policia.
Por menjëherë u përgjigj opozita e bashkuar me një deklaratë, duke mohuar çdo thirrje provokuese nga ana e policisë.
Opozita e bën të qartë se protesta e 16 shkurtit e provoi se nuk ka kriminelë, por qytetarë dhe kërkoi të ndalen kërcënimet.
/Gazeta Mapo/