23 persona janë shoqëruar natën e kaluar në Kukës nga policia, pjesëmarrës në protestën e djeshme në Rrugës së Kombit.
Prej mëngjesit të sotëm, një numër në rritje banorësh janë mbledhur para komisariatit të Kukësit. Ata thonë se nuk dinin asgjë për njerëzit e tyre, që ishin marrë natën nga banesat.
Burime jo zyrtare bëjnë të ditur se të shoqëruarit nuk po mbahen në komisariatin e Kukësit, por nuk dihet destinacioni i tyre, çka ka shqetësuar familjarë e miq, që po qëndrojnë në pritje të një informacioni para drejtorisë së policisë Kukës.
Në Kukës kanë mbërritur edhe shumë deputetë të PD dhe LSI.
Kreu i grupit parlamentar të Partisë Demokratike, Edmond Spaho kërkoi nga selia e policisë së Kukësit që të ndalen arrestimet për protestën, duke theksuar se situata mund të eskalojë në vazhdohet në këtë formë.
“Atij i thamë që i ka prerë në besë qytetarët e Kukësit, pasi dje u është kërkuar që në këmbim të anulimit të protestës nuk do të arrestohet njeri. Gjatë natës si në diktaturë janë arrestuar 24 persona dhe janë lëshuar urdhër-arreste edhe për aq të tjerë. I kërkuam drejtorit ta ndërpresë këtë klimë, i kërkuam që të lirojnë të arrestuarit që i kanë çuar në Tiranë dhe t’i futemi rrugës së dialogut. Nëse vazhdohet kështu situata mund të eskalojë. Shpresoj që ky zë të jetë dëgjuar,” tha Spaho.