Skenat me gaz lotsjellës dhe re të mëdha që mbulojnë zonën e Parlamentit, me njerëz që ikin me vrap, që shtrihen në tokë, që kanë probleme me frymëmarrjen e kalojnë në gjendje të fikëti, po bëhen të shpeshta. Po përveç palëve, protestuesve dhe skalioneve mbrojtëse të qeverisë, ka dhe shumë të tjerë që preken nga ky bombardim i shtuar i policisë. Mapo mendoi të kryente një vëzhgim përreth zonës së Kuvendit, për të ditur sesi ata që jetojnë e punojnë aty, që kanë biznese e njësi shërbimi, i kanë përjetuar masat e ndërmarra të qeverisë për të luftuar tubimet dhe protestuesit. Nis që këtu. Asnjëri nuk pranon të prononcohet me emër, me të dhëna personale, e jo më kot. Fundja, përse të mos frikësohesh? Liria është vendosur në qerthull!
Një shitëse e një dyqani lulesh, m’u përballë organit më të lartë kushtetues në vend, u shpreh se ishte prekur nga gazi lotsjellësi deri në atë pikë, sa një shoqja e saj e kishte dërguar në një lokal aty pranë për të rimarrë veten. “U bëra shumë keq, më ra të fikët. Nuk e kuptova se si më ndodhi”, tha ajo teksa shtoi më tej se në “strofkull” gjendeshin edhe shumë të tjerë në këtë gjendje . “Krahas meje, ishin edhe të tjerë. Me sy të skuqur, me të tështima…Disave u kishin rënë po ashtu të fikët. Ishte një situatë shumë kaotike”. Mirëpo, ajo që përbën çudi është fakti se disa biznese u prononcuan se policia i kishte njoftuar paraprakisht për uljen e qepenave, ndërkohë që, disa të tjerë, thanë se jo, nuk janë vendosur në dijeni. Policia deklaroi dje se nuk ishte në dijeni të zhvendosjes së protestës opozitare nga Kryeministria tek Parlamenti, e megjithatë, sërish kanë paralajmëruar disa biznese. Disa në atë zonë, thonë se kjo dëshmon se policia, edhe në të tilla raste, tregohet selektive.
Punonjësit e një byrektoreje, gjendur m’u përbri selisë së Komunitetit Mysliman të Shqipërisë, u shprehën se bënin pjesë në ato biznese që nuk ishin paralajmëruar për marrjen e masave paraprake. Të kapur në befasi, ishin detyruar të izoloheshin brenda dyqanit për orë të tëra, gjithnjë për t’u mbrojtur ndaj gazit lotsjellës. “Ishte e tmerrshme. Ne nuk u prekëm nga gazi lotsjellës, pasi u mbyllëm brenda. Mirëpo, ankthi ishte i papërshkrueshëm. Ti gjendesh përballë frikës për jetën, kur sheh përtej xhamave vetëm tym dhe kaos”, u shpreh një punonjëse. E sikur të mos mjaftonin të gjitha këto, janë pikërisht këto biznese që përballen edhe me ditë të humbura pune. “Dua të ankohem, po ku?”, u shpreh një librashitës në lidhje me këtë situatë, duke dëshmuar edhe njëherë se sa i pamundur ndihet një qytetar i këtij vendi përballë kësaj qeverisje. Protestat do të vijojnë, të paktën kështu kanë deklaruar udhëheqësit opozitarë. Nga ana tjetër, duket se do të vijohet të përdoret edhe gazi lotsjellës. E ndërsa sipas specialistëve, kjo është ndaluar për t’u përdorur nga Konventat Ndërkombëtare, tek ne mesa duket nuk ka gjasa të ndodhë. Ndërkohë, banorët rreth Parlamentit, bizneset dhe punonjësit po mësohen të kalojnë orë ferri pothuajse çdo javë.
