Presidentja e Kosovës Vjosa Osmani ka lëshuar një njoftim të shkurtër, pas takimit me të dërguarin e posaçëm të Shteteve të Bashkuara për Ballkanin Perëndimor, Gabriel Escobar.
Ajo tha se gjatë takimit me zyrtarin amerikan i tha se Kosova do të vazhdojë të jetë palë konstruktive.
“Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuar për paqe dhe stabilitet në vend dhe rajon”, ka theksuar Presidentja Osmani.
Ajo ka thënë se institucionet janë në komunikim dhe koordinim të vazhdueshëm me partnerët ndërkombëtarë dhe, sipas saj, “çdo vendim i yni reflekton frymën kushtetuese të vendit tonë dhe vlerat tona demokratike.”
“Partneriteti ynë me SHBA-të vazhdon të jetë qenësor”, ka theksuar ajo.
Nga ana tjetër Escobar pasi ka përfunduar takimin me Osmanin, nuk ka pranuar të japë ndonjë prononcim për mediat që prisnin jashtë Presidencës.
