Ushtruesja e detyrës së presidentit të Kosovës, Vjosa Osmani, përfundoi takimet konsultuese me të gjitha partitë politike rreth organizimit të zgjedhjeve të parakohshme.
Pas diskutimeve, tha se data do të caktohet sapo palët të marrin aktgjykimin e plotë të Gjykatës Kushtetuese, që vlerësoi se vota e deputetit Ethem Arifi, për zgjedhjen e qeverisë Hoti më 3 qershor, është jo legjitime, pasi ky i fundit është i dënuar për vepër penale.
Gjatë takimeve, partitë e koalicionit qeveritar dërguan vetëm përfaqësuesit dhe jo kryetarët.
Lidhja Demokratike e Kosovës propozoi datën 7 shkurt për zgjedhjet e parakohshme, ndërsa Partia Demokratike e Kosovës fundin e janarit.
Kreu i Lëvizjes Vetëvendosje, Albin Kurti, nuk caktoi një datë, por kërkoi që votimi për parlamentin e ri të mbahet sa më parë.
Sipas Kushtetutës zgjedhjet duhet të mbahen jo më larg se 40 ditë pasi të gjitha palët të njoftohen për rrëzimin e qeverisë.
Presidentja në detyrë, Vjosa Osmani, bëri me dije se për këtë çështje do të mbajë takime edhe me drejtuesit e Komisionit Qendror Zgjedhor dhe institucioneve të tjera, në mënyrë që organizimi i zgjedhjeve të bëhet sipas standardeve më të larta.
E teksa pritet data, partitë politike të Kosovës janë vënë në lëvizje për t’u përgatitur për votimin e ri. Kreu i LDK-së, Isa Mustafa, u shpreh i habitur për vendimin e Kushtetueses, sa i përket kandidatit të ri për kryeministër, tha se duhej ta vendoste kryesia.
Ndërkohë, në reagimin e parë që prej rrëzimit të qeverisë, Bashkimi Europian tha se u takon institucioneve në Kosovë të ndërmarrin hapat e ardhshëm në përputhje me vendimin e Kushtetueses, duke vënë theksin tek nevoja e miratimit të buxhetit të vitit 2021 sa më parë të jetë e mundur.
