Transferta ndaj Paderborn pas humbjes përballë Bayern Munchen ishte ndeshja e duhur që Borussia Dortmund të rifitonte besimin te forca e saj, sidomos në repartin e avancuar ku mungonte Erling Haland i dëmtuar.
Skuadra e Favre ka shënuar një fitore të thellë 6-1 falë një pjese të dytë ku u shënuan të gjithë golat e kësaj sfide.
Paderborni, ku mungonte për pezullim Klaus Gjasula, u mundua që të rezistonte në pjesën e parë të ndeshjes dhe ia arriti qëllimit përballë ofensivës mike.
Por Borusian e udhëhoqi këtë herë Xhadon Sanço, i cili ishte në formë të shkëlqyer dhe shënoi 3 herë në serinë e golave që filloi në minutën e 54-t të duelit dhe u ndal vetëm në të 91-tën. Hazard, Hakimi dhe Shmelcer ishin autorët e golave të tjerë për ekipin mik, ndërsa Hunemajer shënoi golin e nderit për vendasit.
Me suksesin e sotëm, Borussia vendosi një rekord të ri pas 29 javësh, me 80 gola të shënuar deri tani. Ajo është vetëm 2 gola larg rekordit për të gjithë sezonin, të cilin e ka vendosur në mbyllje të edicionit 2015-2016./ Vipsport.al
Etiketa: Borussia Dortmund, Bundesliga, Haaland, Sanço
