Një ngjarje e rëndë ka ndodhur dy ditë më parë në Krujë, ku 4 persona të maskuar, të armatosur me kallashnikov, pistoletë e shkopa bejsbolli, kanë hyrë në një lokal dhe kanë rrahur barbarisht një të ri.
Nga pamjet e publikuara nga Syri. Tv, duket momenti kur autorët fillimisht i kanë kërkuar klientëve të mos lëvizin, si dhe kur e kanë tërhequr shënjestrën në mes të lokalit, duke e qëlluar disa herë me shkop bejsbolli.
Në lidhje me këtë ngjarje, ka reaguar Policia. I riu duket se është dërguar në spital, ku ka marrë ndihmën mjekësore, më pas është larguar për në banesë.
Disa persona të dyshuar mësohet se janë shoqëruar në komisariat, ndërsa janë sekuestruar edhe pamjet e siguruara nga kamerat e sigurisë.
Hetimi i ngjarjes dhe puna për identifikimin e kapjen e autorëve, po drejtohet nga Prokuroria e Rrethit Gjyqësor Krujë.
Njoftimi i Policisë:
Në lidhje me disa pamje filmike të publikuara në media, ku shfaqen disa persona duke dhunuar një shtetas në një lokal, ju sqarojmë se: Më datë 17.02.2021, në orën 19:40, në ambientin e një lokali në Fushë Krujë, kanë hyrë disa persona ende të paidentifikuar (dyshohet të armatosur), të cilët kanë goditur me sende të forta, duke i shkaktuar lëndime në kokë shtetasit E. E., 30 vjeç, banues në Fushë Krujë, i cili pasi ka marrë ndihmën mjekësore, është larguar në banesën e tij.
Menjëherë pas kallëzimit të bërë nga shtetasi E. E. është ngritur një grup i posaçëm hetimor i përbërë nga specialistë për Hetimin e Krimeve në Komisariatin e Policisë Krujë dhe specialistë për Hetimin e Krimeve në DVP Durrës, të cilët kanë bërë shoqërimin e disa shtetasve të dyshuar dhe në cilësinë e provës materiale janë administruar disa pamje filmike. Nën drejtimin e Prokurorisë së Rrethit Gjyqësor Krujë vijojnë punën intensive hetimore për identifikimin dhe kapjen e autorëve të kësaj ngjarjeje.
