Ligjvënësit e Parlamentit Evropian votuan të mërkurën ndalimin e shitjes së makinave të reja me benzinë dhe naftë pas vitit 2035. Ky hap përshpejton kalimin e Evropës drejt automjeteve elektrike.
Asambleja e BE-së votoi në Strasburg, Francë duke iu kërkuar prodhuesve të automjeteve që të ulin emetimet e dioksidit të karbonit me 100 përqind, deri në mesin e dekadës së ardhshme. Mandati sjell rrjedhimisht një ndalim të shitjes në bllokun 27-vendesh të makinave të reja me benzinë ose naftë.
Ligjvënësit e BE-së miratuan gjithashtu një reduktim prej 55 përqind të CO2 deri në 2030. Masa thellon një detyrim ekzistues për industrinë e makinave për të ulur shkarkimet e CO2 me 37.5 përqind mesatarisht në fund të dekadës, krahasuar me vitin e kaluar. Vendimi u miratua me 339 vota pro, 249 kundër dhe 24 abstenime.
Makinat aktualisht përbëjnë 12 për qind të të gjitha emetimeve të CO2 në BE, ndërsa transporti në përgjithësi zë rreth një të katërtën.
Pas votimit, kryetari i komitetit mjedisor të BE-së, Pascal Canfin, shkroi në Twitter: “Makina 100 për qind me emetim zero në 2035! Unë mirëpres fuqishëm votimin për standardet e CO2 në @Europarl_EN. Ky qëndrim i Parlamentit Evropian është një fitore e rëndësishme dhe në përputhje me objektivin tonë për klimën”.
Ligjvënësi gjerman Michael Bloss gjithashtu përshëndeti votimin, si një masë që do të mbronte njëkohësisht klimën dhe vendet e punës në këtë sektor.
Deputetja franceze e EPP Agnes Evren ishte më pak e impresionuar, duke u shprehur se ky vendim”do të dënonte aktivitetin industrial dhe do të penalizonte fuqishëm konsumatorët”.
Ajo tha se legjislacioni do të parandalonte komercializimin e automjeteve hibride me performancë të lartë ose automjeteve që përdorin biokarburantet, prodhimi i të cilave sipas saj mund të rezultojë më pak i kushtueshëm dhe më pak ndotës se automjetet elektrike./Liberale.al
