Pas shqetësimeve të shumta të qytetarëve mbi çmimin dhe cilësinë e bukës, ministrja e Financave dhe e Ekonomisë, Delina Ibrahimaj, ka mbledhur sot në një diskutim Shoqatën e Prodhuesve të Bukës, për të ndarë me ta problematikën e krijuar.
Mësohet se shumë qytetarë janë ankuar se pesha e bukës nuk përputhet me standardin, çka krijon dyshime për abuzim, sikurse çmimi i miellit ka pësuar rënie kohët e fundit. Qytetarët janë ankuar po ashtu se me uljen e çmimit të miellit nënprodukte si buka në vend që të uleshin, janë ngritur.
“Morëm shkas nga shqetësimet e ngritura nga konsumatorët në lidhje me standardet e tregtimit të bukës në vend, për të zhvilluar një takim me përfaqësues të Shoqatës së Prodhuesve të Bukës”, theksoi Delina Ibrahimaj.
Sipas ministres, “është detyrimi ynë të mbrojmë interesat e konsumatorëve dhe të kërkojmë respektimin e detyrimeve ligjore, për tregtimin e këtyre produkteve të shoqëruar me informacionet e nevojshme ( pesha, çmimi, etj.) lehtësisht të dallueshme dhe të lexueshme”.
Ajo nënvizoi më tej, se “Inspektorati Shtetëror i Mbikëqyrjes së Tregut po ndërmerr të gjitha veprimet e nevojshme për realizimin e inspektimeve që synojnë informimin dhe ndërgjegjësimin e subjekteve tregtare konform akteve ligjore në fuqi”, ndërkohë pritet se cili do të jetë reagimi i prodhuesve të bukës në ditët në vijim. /Liberale.al/
