Sasia e vaksinave të cilat nuk mundën të vinin dje në vendin tonë, për shkak të grevës së kontrollorëve ajrorë në Aeroportin e Rinasit, ka mbërritur mesditën e sotme.
Bëhet fjalë për 100 mijë dozash vaksina kineze Sinovac.
“Me një ditë vonesë për shkak të tentativës çmendurake për bllokimin e fushatës së vaksinimit dhe nxitjen e rrëmujës në prag të zgjedhjeve, mbërrijnë 100,000 vaksina të tjera anticovid
Më të vendosur se kurrë për të vazhduar me ritme të larta vaksinimin masiv dhe për të garantuar një sezon turistik të lehtësuar e me të ardhura të larta për Shqipërinë
” , – shkruan kryeministri Edi Rama në “Facebook”.
Risjellim në vëmendje se prej ditës së djeshme deri sot në mëngjes, nuk ka patur fluturime në Aeroportin e Rinasit. 60 kontrollorë u futën në grevë për të kundërshtuar reduktimin e pagave në 70% dhe shkarkimin e 5 kolegëve.
Veprimi shkaktoi përplasje mes palëve politike dhe mjaft tension. Kryeministri Edi Rama dhe ministrja e Infrastrukturës e quajtën grusht shteti, ndërsa kontrollorët i cilësuan me prapavijë politike.
28 kontrollorë u shoqëruan mesditën e sotme në komisariat, ndërsa 3 prej tyre janë ende në ambient paraburgimi.
Risjellim në vëmendje se Rama fajëson si organizatorë të grevës presidentin Ilir Meta dhe ish-kryeministrin Sali Berisha, ndërkohë që këta të fundit e akuzojnë për keqmenaxhim të situatës.
