Shkodra u trondit mbrëmjen e së hënës nga atentati mafioz ndaj një ish-zyrtari të lartë. Pashko Ujka, 64 vjeç, ish-kryetar i Komunës së Velipojës dhe ish-deputet u qëllua pranë banesës së tij në lagjen “Vasil Shanto”, teksa ishte me bashkëshorten dhe ndërroi jetë në spital 2 orë më vonë, gjatë operacionit ku ishte futur për t’i shpëtuar plagës së marrë në shpinë.
Policia tha se dyshohet se krimi ndodhi për shkak të detyrave të mëparshme të Ujkës, ndërsa flitej dhe për borxhe.
Por sot nisur nga lajmet dhe pistat e para që kanë dalë në media, të afërmit e tij kanë reaguar dhe sqarojnë për korespondentët e Shkodrës, se nuk është e vërtetë që ai të jetë plagosur, kërcënuar apo qëlluar më parë, gjatë kohës kur ka qenë deputet apo kryetar i komunës Velipojë. Gjithashtu sipas tyre, Ujka nuk i ka pasur borxhe financiare ndokujt, dhe s’ka pasur as mosmarrëveshje për çështje ndërtimesh me ndonjë person.
Ngjarja ndodhi rreth orës 18:15 në lagjen “Vasil Shanto” në Shkodër, kur 64-vjeçari po lëvizte më këmbë me bashkëshorten e tij. Janë ende të paqarta rrethanat e ngjarjes dhe grupi hetimor nën drejtimin e Prokurorisë po vijon punën për sqarimin e tyre.
Atentati duket i mirëorganizuar dhe tipik mafioz, për mënyrën se si është realizuar dhe sidomos për përdorimin e armës me silenciator. Megjithëse ngjarja është e rëndë, ende nuk ka një komunikim nga policia.
