Pas ambasadores Yuri Kim, edhe kryesuesja e Presidencës së OSBE-së, ministrja e Jashtme suedeze Ann Linde ka përgëzuar Edi Ramën për fitoren e zgjedhjeve të 25 Prillit në Shqipëri
“Urimet e mia më të ngrohta Edi Ramës mbi rezultatet e zgjedhjeve parlamentare në Shqipëri. Në pritje të bashkëpunimit tonë të ngushtë të vazhdueshëm në OSBE”-shkruan Linde.
Më herët, Ambasadorja amerikane Yuri Kim dhe zëdhënësi i DASH, përgëzuan kryeministrin Rama dhe Partinë Socialiste për fitoren, si edhe kryetarin e Partisë Demokratike Lulzim Basha për fushatën e fortë.
Ambasadorja Kim shkroi se duke njohur rezultatet e këtyre zgjedhjeve dhe duke bashkëpunuar me njëri-tjetrin, liderët politikë do të tregojnë se janë duke vepruar të përgjegjshëm për të mirën e shqiptarëve.
SHBA, shprehet Kim, pret tashmë që të forcohen më tej marrëdhëniet mes dy shteteve për demokracinë, mbrojtjen dhe biznesin. Gjithashtu ajo thotë se pret raportin final të OSBE/ODIHR mbi zgjedhjet parlamentare në Shqipëri.
Dje, Përfaqësuesi i Lartë i BE, Josep Borrell, dhe Komisioneri për Zgjerimin, Olivér Várhelyi, u bënë thirrje forcave politike në Shqipëri të pranojnë rezultatin e zgjedhjeve.
Borrel dhe Varhelyi bënë gjithashtu thirrje që çdo parregullsi të raportohet te Komisioni Qendror i Zgjedhjeve dhe autoritetet kompetente dhe që rastet, përfshirë pretendimet për blerje vote, të hetohen.