Partia Bindja Demokratike prezantoi në Elbasan 15 kandidatët për deputetë në zgjedhjet e 25 prillit.
Kryetari i kësaj force politike, Astrit Patozi theksoi se ndryshe nga partitë e tjera, Bindja Demokratike garon me lista të hapura duke u ofruar qytetarëve të drejtën të votojnë për kandidatët që sipas tij do të sjellin ndryshimin e shumë kërkuar.
“Kam besim se kjo shpreh vrullin dhe entuziazmin e rinisë shqiptare për të arritur ndryshimin,” tha Patozi.
Patozi komentoi edhe përplasjen e militantëve të PS e PD ditën e Verës në Elbasan, duke bërë me faj të dyja palët.
“Është një provë e qartë, pse, jo vetëm Elbasani por të gjithë qytetarët shqiptarë duhet të zgjedhin të renë, nuk duhet të zgjedhin forcat e vjetra politike të cilat i kanë shkaktuar probleme të mëdha vendit,” tha Patozi.
Koordinatori e njëkohësisht kandidati i Bindjes Demokratike për Qarkun e Elbasanit, Erion Murataj tha se fryma e re dhe ndryshimi politik nuk mund të ndalet më 25 prill.
“Nuk ka luftë që nuk fitojnë të rinjtë. Kushdo që mendon se mund të ndali frymën e re dhe ndryshimin politik që do të përfaqësoj ajo që do të vij pas 25 Prillit e ka shumë gabim. Ne jemi jo thjeshtë një alternativë sfiduese e dy kampeve të cilat Shqipërisë i kanë dhënë vetëm dhe vetëm prapambetje,” u shpreh Murataj.
Bindja Demokratike do të garojë në qarkun e Elbasanit me 15 kandidatë.
