Ambasada amerikane në Tiranë ka korrigjuar njoftimin në faqen zyrtare lidhur me një protestë të paralajmëruar këtë të mërkurë në orën 17:00 përpara kryeministrisë kundër rritjes së çmimeve.
Në faqen e saj, ambasada i bëri thirrje qytetarëve amerikanë që jetojnë në Shqipëri të shmangnin zonën ku do të zhvillohej tubimi.
Ndërkohë apeli për kujdes niste me fjalinë se “Partia Demokratike e Shqipërisë ka njoftuar se do të mbajë një protestë pranë zyrës së Kryeministrit”.
Por në faqen zyrtare të ambasadës, mund të shihet që ky njoftim është përditësuar.
Fjalia ku përmendej se protesta e sotme ishte lajmëruar nga PD, është korrigjuar, duke e hequr Partisë Demokratike.
Kujtojmë që pak ditë më parë, në mbledhjen e grupit parlamentar, por edhe për mediat, kryedemokrati Lulzim Basha u shpreh se PD do të mbështesë të gjitha format e reagimit popullor kundër rritjes së çmimit të energjisë.
Njoftimi i parë i Ambasadës amerikane në Tiranë, ku përmendjej PD
Partia Demokratike (PD) e Shqipërisë ka njoftuar se do të zhvillojë një protestë para Kryeministrisë. Qëllimi i deklaruar është kundër rritjes së kostos së energjisë elektrike në Shqipëri. Kjo protestë mund të migrojë në vende të tjera në Tiranë, ose tubime të ngjashme mund të shfaqen në pjesë të tjera të qytetit. Kohëzgjatja e mbledhjes së pritshme është e panjohur. Qytetarët amerikanë këshillohen të shmangin çdo tubim të madh në qytet. Ndërsa shumë ngjarje të mëdha publike mund të zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale dhe ndiqni udhëzimet e autoriteteve vendore të zbatimit të ligjit për informacionin më të fundit.
LEXO EDHE:
Ambasada e SHBA: PD sot proteston kundër rritjes së çmimit të energjisë
