Deputeti i Partisë Demokratike, Gazment Bardhi ka reaguar pas deklaratës së ish-kryeministrit Sali Berisha, i cili e quajti antiligjor vendimin e Gjykatës së Apelit, teksa zgjodhi sot trupën gjykuese të Apelit që do të vendosë fatin e Partisë Demokratike (nëse do t’i mbetet pjesës aktuale, apo Rithemelimit).
Bardhi thotë se Berisha duhet t’i japë fund hipokrizisë dhe të lejojë bashkimin e demokratëve. Ai pretendoi se Berisha e paragjykon vendimin e Apelit, sepse ndjen humbjen, dhe për këtë arsye sulmon gjyqtarët.
“Gjykata nuk mund të jetë e pavarur, kur Zhukri i Berishës vendos pro tij dhe është politike, kur gjykata nuk i nënshtrohet akuzave të tij”, reagoi në Twitter deputeti i PD-së.
Reagimi i plotë i Gazment Bardhit:
Sali Berisha duhet t’i japë fund hipokrizisë me demokratët dhe përçarjes së tyre. Standardi i dyfishtë me gjykatat dëmton besimin e demokratëve në ringritjen e PD.
Gjykata nuk mund të jetë e pavarur, kur Zhukri i Berishës vendos pro tij dhe është politike, kur gjykata nuk i nënshtrohet akuzave të tij. Vendimi i gjykatës për çështjen e PD, cilido qoftë ai, duhet t’i hapë rrugën bashkimit të vërtetë të demokratëve. /Liberale.al/
