Partia Demokratike ka reaguar ashpër pas shoqërimit të disa protesteve në polici lidhur me protestën e sotme. Mediat pasqyruan me pamje dhunën e ushtruar nga policia ndaj personave të shoqëruar. Po kështu deputetët PD kanë arritur të hyjnë në ambientet e Drejtorisë së Policisë Tiranë për të parë nga afër protestuesit. PD kanë dalë me një deklaratë të rrufeshme ku i bën thirrje jo vetëm policisë si institucion por edhe efektivëve personalisht të heqin dorë nga dhuna e presioni.
Deklarata e plotë e PD-së
Partia Demokratike dënon me forcë ushtrimin e dhunës policore ndaj kundërshtarëve politikë. Rrahja dhe keqtrajtimi i protestuesve prej policisë politike nuk ka për ta shpëtuar dot kryehajdutin Edi Rama dhe pushtetin e tij të blerë me paratë e krimit të organizuar.
Secili prej anëtarëve të Policisë Politike që, në shkelje të ligjit, po shoqëron, dhunon dhe po ushtron presion ndaj protestuesve, do të mbajë përgjegjësi personale. Ne nuk do ta harrojmë këtë!
PD falenderon çdo qytetar pjesëmarrës në protestë, që sakrifikoi sot diçka nga vetja për t’i shërbyer misionit madhor të çlirimit të qeverisjes nga një grusht hajdutësh, oligarkësh dhe kriminelësh, që ka marrë peng vendin.
16 Shkurti është fillimi i betejës për çlirimin e vendit nga Kryeministri hajdut. Fundi i tij është i pakthyeshëm!
Shqiptarët treguan sot se, të bashkuar, mund ta mposhtin të keqen! E enjtja është shumë afër.