fbpx

Aktualitet

PD nxjerr dokumentet: Si dha leje Veliaj për qender tregtare mbi projektin e terminalit





               Publikuar në : 20:43 - 12/02/19 |
mapo.al

Biznesmeni nga Kosova njëherësh deputet, Ramiz Kelmendi akuzoi dje publikisht kryetarin e Bashkisë së Tiranës, Erion Veliaj se i kishte anuluar inevstimin 5 milionë eurosh, për të cilin vetë Bashkia e Tiranës kishte dhënë leje ndërtimi. Biznesmeni ka derdhur në Bashki taksën prej 1.2 milionë euro ndërsa 3 muaj më pas punonjësit e bashkisë i kanë shkuar në kantier për të pezulluar punën.


Partia Demokratike ka reaguar ndaj këtij skandali, duke nxjerr gjithë dokumentet, lejen e ndërtimit për qender tregtare tek kthesa e Kamzës dhe për më tepër edhe projektin e mëparshmë për terminal. Pra sipas PD, Erion Veliaj ka konsumuar vepren penale të shpërdorimit të detyrës, pasi ka miratuar leje ndërtimi në zonën e planifikuar prej vitesh për ngritjen e terminalit të pasagjereve. PD pyet “A ka një informacion të përgjithshëm kryetari i Bashkisë Tiranë se sa vite heqje lirie rrezikon për veprën penale që ka konsumuar?”



Deklarata e plotë

Departamenti Antikorrupsion ne Partine Demokratike: PËRSE MIRATOI LEJE NDËRTIMI VELIAJ NË NJË TRUALL PËR TË CILIN KISHTE PROJEKT?!

Dje z. Ramiz Kelmendi, me anë të letrës publike drejtuar KIryetarit të Bashkisë Tiranë, akuzonte këtë të fundit për ndërhyrje të paligjshme, duke pezulluar punimet e ndërtimit, ndërtim për të cilin vetë ky institucion ka miratuar leje ndërtimi në 31 tetor 2018.

Pa hyrë në themel të konfliktit mes palës private dhe palës shtetërore, nga verifikimet rezultojnë fakte për të cilat Bashkia Tiranë ka detyrimin ligjor të japë shpjegime.

Së pari, për zonën në fjalë, (Mëzez, kthesa e Kamzës) qysh në 2013 është në fuqi projekti i financuar nga IFC për ndërtimin e një terminali multimodal. http://acp.al/projects/119/Terminali-Multimodal/

Pikërisht në zonën objekt i projektit, në 31 tetor 2018, Bashkia Tiranë ka miratuar leje ndërtimi për qendër tregtare, në favor të shoqërisë “Elkos” shpk.

Shoqëria përfituese e Lejes së sipërpërmendur, në vijim të miratimit të saj dhe në përputhje me detyrimin ligjor, ka kryer pagesën e taksës së ndikimit në infrastrukturë, me vlerë 157,977,643 lekë (1,25 mln Euro).

Në reagimin e tij kryetari i Bashkisë Tiranë tërthorazi pranoi se leja e ndërtimit e lëshuar prej tij, nuk mund të zbatohet. Për këtë ai përmendi falsifikime dokumentash e marifete.

Por në të vërtetë Bashkia Tiranë në 2016 ka qenë pjesë e procesit të njohjes të pronësisë, duke kryer ajo vetë afishimin publik, me fuqi ligjore pranë Njësisë Administrative Kashar.

Së dyti, siç u përmend më sipër dhe siç e pohoi vetë titullari i institucionit, për këtë zonë ka një projekt në fuqi. Vetë z. Veliaj pohoi vullnetin për zbatimin e tij.

Pyetjet që lindin natyrshëm janë:

Përse Bashkia Tiranë miratoi leje ndërtimi në zonë për të cilën ka një projekt që pret të zbatohet?

Përse Bashkia Tiranë pranoi edhe pagesën e taksës prej 1,2 mln euro nga subjekti privat kur nuk kishte vullnet të lejonte zbatimin e lejes së miratuar nga ajo vetë?

Kush mban përgjegjësi për shkeljet e të drejtave që gëzon subjekti privat, të drejta të cilat i ka fituar duke respektuar procedurat ligjore?

Përpara një skandali të tillë shumëplanëshe, reagimet e z. Veliaj janë thellësisht të pamjaftueshme për të justifikuar ligjërisht shkelje, të cilat konfigurojnë vepër të pastër penale.

A ka një informacion të përgjithshëm kryetari i Bashkisë Tiranë se sa vite heqje lirie rrezikon për veprën penale që ka konsumuar?

Edhe pse shpresëpak, mbetemi në pritje të një reagimi serioz të autorit të këtij shpërdorimi me detyrën dhe cënimi të të drejtave të njeriut.


Etiketa: , , ,

Pas