Parlamenti Europian do t’i bëjë thirrje 5 vendeve të BE-së që ta njohin sa më shpejt Kosovën si një shtet të pavarur.
Kjo ftesë e PE-së përsëritet në draft-raportin për Kosovën, të përgatitur në Komisionin e Politikës së Jashtme nga raportuesja për Kosovën, Viola von Cramon.
Për të do të debatohet së pari në Komisionin e Jashtëm të Parlamentit Evropian, ku do të votohet si raport. Pastaj do të debatohet dhe miratohet edhe si rezolutë e Parlamentit Evropian gjatë një seance plenare.
“Pesë shtetet anëtare ende nuk e kanë njohur Kosovën dhe përsëritet thirrja ndaj atyre që ta bëjnë këtë; nënvizohet se njohja do të ishte në dobi të normalizimit të raporteve mes Kosovës dhe Serbisë”, – thuhet në dokument.
Kosova vazhdon të vuajë nga jostabiliteti politik, shkruhet në të, sidomos pas zgjedhjeve parlamentare të tetorit të vitit 2019, kësisoj kërkohen përpjekje të vazhdueshme për të adresuar probleme në fushën e sundimit të ligjit, të drejtave themelore dhe funksionimin e institucioneve dhe zhvillimit ekonomik.
Raporti nënvizon se Kosova vazhdon të jetë i vetmi shtet i rajonit të Ballkanit Perëndimor, qytetarët e së cilit kanë nevojë për viza për të udhëtuar në zonën Shengen, edhe pse i ka përmbushur të gjitha kushtet për liberalizimin e vizave që në vitin 2018.
Në dokument shprehet po ashtu keqardhje për shuarjen e task-forcës anti-korrupsion brenda Policisë së Kosovës, dhe kërkohet gjithashtu më shumë përpjekje për zbulimin e fatit të personave të pagjetur që nga lufta e fundit në Kosovë.
Aty përsëritet mbështetja për krijimin e komisionit rajonal për faktet e krimeve të luftës dhe shkeljeve të rënda të të drejtave të njeriut në territorin e ish-Jugosllavisë.
“Bëjmë thirrje për përpjekje më të mëdha në shqyrtimin e kërkesave të familjarëve të personave të pagjetur, hapjen e arkivave të luftës dhe zbulimin e të dhënave për personat të cilët ende janë të listuar si të zhdukur nga periudha e luftës 1998-99 në Kosovë”, – thuhet në dokument, ku fokusi vendoset edhe tek gjendja e mjedisit.
Evidentohet niveli i lartë i ndotjes në Kosovë dhe kërkohet që të rriten kapacitetet e prodhimit të energjisë nga burimet alternative. PE-ja shpreh shqetësim për nivelin e lartë të vdekshmërisë së hershme si pasojë e ndotjes dhe kërkon të adresohen këto probleme dhe gradualisht të ndërpritet prodhimi i energjisë nga qymyri.
Në këtë drejtim kërkohet nga Kosova të respektojë standardet evropiane, ndërsa nga Komisioni Evropian kërkohet që të përfshijë Kosovën në strategjinë e Marrëveshjes së gjelbër evropiane.
