Kuvendi Kombëtar, që u trumbetua nga lidershipi i PD si bashkim i demokratëve pas goditjes që morën më 25 prill, nuk solli asgjë tjetër vetëm se thellimin e përçarjes të kësaj force politike. Forumi më i rëndësishëm ku duhej të kryhej analiza e humbjes, u shndërrua në një “lavatriçe” për të pastruar kryetarin e partisë nga çdo mëkat.
Fajtori për humbjen e demokratëve na paskërkësh qenë vetëm Rama, por askush nuk foli për atë çka ndodhi atje në bazë. Për mesazhin që mungoi, për kopjimin deri në detaj të fushatës humbëse të 2017-ës, për komandimin që iu bë kandidatëve nga qendra, për rikandidimin e dështakëve të atij viti në zgjedhjet e tanishme deri dhe drejtues politikë Qarku, për mbylljen akoma më shumë të partisë, për frymën e cila nuk arriti të përçohet në elektorat, për aleancat copë-copë etj. Jo, për këto duhej të fajësohej sërish Edi Rama… Mark Marku për disa të vërteta që tha, pa marrë ende mandatin po shihet si armik
Por këto ishin vetëm colateral damage-t që sollli Kuvendi. Katastrofa do vinte më pas me shpalljen e fituesve pa bëre transparent rezultatin. Kupola e PD po sillet keq me anëtarësinë, madje shumë keq dhe gjërat duhen thënë troç. Të fshehësh humbjen pas mantelit të manipulimeve nga kundërshtari dhe të shpallësh emrat fitues pa i dhënë secilit hakën, është sjellje prej autokrati. Furtuna e sulmeve për lënien jashtë të disa prej atyre që kanë spikatur me kontributin e tyre ka rënë mbi Sekretarin e Përgjithshëm, Gazment Bardhi.
Vetë Basha, me anë të një mesazhi dërguar atyre që ankoheshin për procesin u është përgjigjur me një justifikim standard, se nuk është marrë me listat pasi ka qenë i zënë me një problem familjar për arsye shëndetësore. Mund të jetë dhe kështu, por ama Basha pavarësisht arsyeve ka detyrimin që t’i përgjigjet atyre që dhanë shpirtin në fushatë se përse nuk ka dalë rezultati i votave për Këshillin.
Proçesverbalet nuk i ka futur në xhep as Jemini e as Gazi, dikush i ka urdhëruar të mos dalin në mejdan. E në rast se ka përdorur katapultën duhet një shpjegim se përse disa persona që nuk janë parë asnjëherë në PD ose në fushatë e meritojnë të jenë anëtarë të Këshillit Kombëtar më shumë se ata që u kacafytën në terren me falangat e Rilindjes, që vazhdojnë të marrin kërcënime apo deri aty sa kanë rrezikuar jetën e tyre dhe të familjarëve nga bombat që u viheshin te pragu i derës. A e ka idenë kryetari për zhgënjimin e tyre?
Duket se me përzgjedhjen e atyre që do jenë në Këshill Kombëtar diçka ka ndodhur. Natyrisht aty ka dhe emra që kanë pasur dhe kanë jo pak kontribut, madje dhe nga ata të rinjtë që janë futur. Por se të duhen të rinj, s’do të thotë të përjashtosh ata që ishin. Ata i përjashton vota, dhe jo urdhrat apo prapaskenat me sfond inatçi dhe sipas midesë të njërit apo tjetrit, qoftë ky kryetari i partisë apo drejtuesi politik i Qarkut. Fundja çfarë i kushtonte partisë që kur e bëri han pa porta me 300 anëtarë të bëheshin dhe 400.
Ose, ose të linte jashtë këtij forumi deputetët e zgjedhur, që mjaft privilegje kanë dhe Këshillin si forum kontrollues t’ia linte garës së hapur mes anëtarësisë së bazës. Ç’është kjo mani e ky frustim për të kontrolluar çdo qelizë të partisë, sipas modelit Rama? Lidershipi duket se akoma s’e ka kuptuar që të djathtët ta lënë targën jo më shumë nga humbja e zgjedhjeve se sa nga imitimi që kërkohet t’i bëhet kundërshtarit të tyre politik.
Është e udhës që të gjithë ata që po sulmohen për farsën e Kongresit të sqarojnë pozicionin e tyre. Heshtja nuk shërben për asgjë, kjo që ndodhi ka kosto të madhe dhe hendeku mes qendrës e bazës do thellohet dhe më tej. Degët e PD ishin në amulli pas humbjes së zgjedhjeve, tashmë rrezikojnë të kthehen në gërmadhë që vështirë të ristrukturohen dhe për zgjedhjet e 2025-ës e jo më për zgjedhjet e afërta lokale.
Se si e kanë menduar Basha dhe të tjerë këtë udhë që kanë marrë është punë e tyre, por ama kurrsesi s’është punë e tyre zhbërja e PD-së dhe opozitës në këtë farë feje. Demokratët në veçanti dhe shqiptarët në përgjithësi nuk do durojnë pa fund bëmat e Rilindjes dhe deklaratat e Taulantëve dhe Elisave për “shtetbërjen”. Ata sot duhet të jepnin llogari tjetër kund. Dhe e gjitha kjo sepse opozita nuk arrin të dalë dot nga nepotizmi, mungesa e demokracisë apo dhe të bërit biznes me idealet e atyre që besojnë.
Kjo lloj pengmarrje është e pajustifikueshme…
