Elira Kokona, përfaqësuesja e qeverisë në Gjykatën Kushtetuese, ka folur në lidhje me padinë e Presidentit Ilir Meta, për Teatrin Kombëtar.
Mësohet se ajo është shprehur se Presidenti ka bërë padinë, duke mos u mbështetur në fakte ligjore.
Më tej në Gjykatën Kushtetuese, ku është zhvilluar dhe mbledhja për çështjen e Teatrit, ajo ka thënë se godina e Teatrit Kombëtar nuk ka pasur asnjë vlerë kulturore.
“Çështja është e vështirë, Presidenti është nisur nga fakte që nuk janë ligjore. Rrethanat mbi të cilin bazohet pretendimi dhe kërkesat nuk janë të denja për GJK, nuk janë në kompetencë të GJK.
A mundet Gjykata Kushtetuese të vihet në lëvizje nga Presidenti për një pronë? Godina për të cilën për fat të keq jemi mbledhur këtu nuk është objekt i gjykimit kushtetues. Godina e TK nuk ka pasur vlerë kulturore. Pronat që mbartin vlerë kulturore kanë statuse specifike si monumente kulturore, zona të mbrojtura apo ansamble të mbrojtura.
Teatrit Kombëtar në asnjë moment nuk i është dhënë statusi monument kulture. Prej disa vitesh TK selinë e ka në godinën Art Turbina. Rekuizitat dhe arkivat me urdhër të Ministrisë së Kulturës janë transferuar në këtë godinë.
Në momentin që godina i është transferuar Bashkisë Tiranë ka qënë një pronë publike pa funksion publik, në të nuk zhvillohej asnjë aktivitet. Presidenti i është drejtuar GJK për akte tipike individuale, duke i kërkuar Gjykatës të zgjerojë praktikën e saj. GJK të mos shkojë në këtë drejtim të rrezikshëm. ”- ka thënë ajo.
