Është përjashtuar pista e hakmarrjes nga hetimet për vrasjen e Ismet Çekores.
Policia vendore e Shkodrës ka bërë shoqërimin e më shumë se 15 personave në komisariat për t’u marrë në pyetje. Mes të shoqëruarve është edhe shtetasi Alban Bruçi ndaj të cilit më 25 gusht të këtij viti iu bë një atentat në lagjen Rus ndërsa policia shpalli në kërkim shtetasin Bajram Çekorja si autor i dyshuar, djali i viktimës Ismet Çekorja që u vra dy ditë më parë.
Të gjithë personat që u shoqëruan për vrasjen e Çekores janë lënë të lirë nga policia e Shkodrës. Në këtë mënyrë kanë rënë poshtë dyshimet se vrasja e Çekores ka lidhje me atentatin ndaj Alban Bruçit.
Përpos kësaj pak ditë përpara se Ismet Çekorja të vritej është takuar me babain e Alban Bruçit pasi kishin lidhje shoqërore të hershme dhe familjet janë sqaruar me njëra-tjetrën se Bajram Çekorja, djali i viktimës nuk ka asnjë lidhje me atentatin ndaj Alban Bruçit.
Ndërkohë policia vendore e Shkodrës vijon hetimet për zbardhjen e plotë të vrasjes së Ismet Çekores.
Burimet pranë grupit hetimore bëjnë me dije se po hetohet për ngjarje të tjera, të para disa viteve në të cilat mendohet se është i përfshirë i biri i viktimës dhe vetë ai.
Bajram Çekorja është një emër i njohur për policinë, dhe ka qenë dy herë i ndaluar nga blutë e Shkodrës, në vitin 2016 dhe 2019.
