Drejtuesi politik i PS-së për qarkun e Elbasanit, Taulant Balla, ka zhvilluar sot një takim me banorët e lagjes nr.11 të qytetit, ndërsa akuzoi PD-në për përleshjen e djeshme mes simpatizantëve të dy forcave politike.
Sipas Ballës, fajtori i vetëm dhe organizatori i incidentit ishte kryedemokrati Lulzim Basha.
Kryeministri Edi Rama dhe socialistët përfaqësues, mëshoi Balla, jo pa qëllim anuluan çdo lloj aktiviteti politik, sepse dje ishte festë – Dita e Verës – dhe në festë nuk bëhet politikë.
“Kurrë më parë nuk kishte ndodhur që një parti politike të shkojë në festë me flamuj dhe të organizojë miting për të fyer e sharë kundërshtarët politikë. Gjatë takimeve që kam zhvilluar sot me qytetarë të Elbasanit më kanë shprehur indinjatën e tyre për atë që PD bëri një ditë më parë”, – tha Balla.
“Kur shkon diku për festë unë nuk di që duhet të shkosh me flamuj, të hipur nëpër makina dhe që pastaj të flasësh ti në emër të popullit. Festën dje e kishte populli i Elbasanit. Jo pa qëllim, ne anuluam çdo lloj aktiviteti politik sepse dje ishte një festë dhe në festë nuk bëhet politikë.
Pastaj, nja 100 stereotipe të ngjashme me Ilir Metën apo me Sali Berishën, filluan jo vetëm thirrjet e karakterit politik por edhe thirrje me mungesë të theksuar të kulturës dhe shprehje kuptimplota të rrugaçërisë. Megjithatë, unë uroj që demokratët e thjeshtë dhe të ndershëm të Elbasanit, të distancohen nga ajo ngjarje” , – vijoi Balla.
“Organizator ishte Basha, sepse të mbledhësh njerëz dhe t’i çosh kundër partisë tjetër është e papranueshme. Bëj takimin tënd, fol çfarë të duash ti, thirr si të duash ti por tjetri ka të drejtën e vet. Ne për të respektuar kushtet e Covid-it, unë nuk kisha ftuar as deputetët, ishim vetëm Kryeministri Rama, unë, Evis Kushi, kryetari i bashkisë, kaq sepse aq lejon ligji. S’mund të mbledhim më shumë njerëz dhe gjithë të tjerët aty ishin njerëz që ishin pjesë rastësisht të festës. Ndërkohë, ato mbledhin rreth 100 njerëz me thirrje banale. Turp!”
Përplasja mes simpatizantëve PD-PS në qendër të Elbasanit ndodhi teksa kryedemokrati Lulzim Basha dhe kryeministri Edi Rama mbërritën në qytet për të uruar qytetarët për Ditën e Verës.
Risjellim në vëmendje se Basha fajëson Ramën për provokim në sajë të banditëve të armatosur, ndërsa ky i fundit liderin demokrat për nxitje të militantëve.
