Zbardhen detaje të reja nga përplasja me armë zjarri te mbikalimi i Shkozetit në Durrës, ku tre persona mbetën të plagosur. Burime për MAPO bëjnë të ditur se shënjestër e atentatit ka qenë prokurori i Durrësit, Arjan Ndoja. Ai ndodhej në makinë së bashku me dy persona të tjerë të identifikuar si Landi Muharremi i cili njihet edhe me emrin Aleksandër Laho, një person me precedentë të mëparshëm penalë dhe tjetri është Andi Maloku, 30 vjeç, i cili është shoferi i prokurorit.
Automjeti tip Benz i prokurorit pas atentatit
Vendi ku ndodhi ngjarja pranë mbikalimit të Shkozetit
Prokurori Arjan Ndoja është transportuar me urgjencë në spitalin e Durrësit ku po i nënshtrohet një operacioni, pasi ka marrë dy plumba në trup. Mësohet se ai është jashtë rrezikut për jetën.
Në momentin e ngjarjes prokurori ishte duke lëvizur me automjetin e tij tip “Benz ML” me targa AA 333 ZD, kur është qëlluar nga një makinë tjetër. Makina është në pronësi të Fadil Callikur, por përdorej nga prokurori. Burime pranë grupit hetimor bëjnë të ditur se nga kamerat e sigurisë të disa bizneseve aty pranë duket një automjet Fuoristradë teksa ndjekur makinën e prokurorit. Në drejtim të automjetit është qëlluar nga një armë zjarri kallashnikov dhe në vendin e ngjarjes janë gjetur plot 15 gëzhoja.
Prokurori Arjan Ndoja
Prokurori Arjan Ndoja u vu në qendër të akuzave pak ditë më parë nga kryeministri Edi Rama i cili u shpreh se ai i shërbente bandave kriminale në qytetin e Durrësit dhe se iu bënte presion e shantazh punonjësve të administratës publike. Akuza ndaj prokurorit hodhi edhe zv/kryeministri Erion Braçe pas arrestimit të ish-kreut të Kadastrës së Durrësit për shpërdorim detyre.
Prokurori Arjan Ndoja
Njoftimi i Policisë
Informacion paraprak
Ne aksin rrugor Durrës – Tiranë në afërsi të mbikalimit të Shkozetit, rreth orës 16:30, në afërsi të vendit të quajtur “Mbikalimi i Shkozetit” kanë qëlluar me armë zjarri në drejtim të mjetit me targa AA 333 ZD, e për pasojë janë plagosur shtetasit A.L., 48 vjeç, A.N., 44 vjeç dhe A.M., 30 vjeç.
Shtetasi A.M. është nisur për mjekim të specializuar në Spitalin e Traumës në Tiranë, ndërsa dy shtetasit e tjerë ndodhen në Spitalin Rajonal Durrës, jashtë rrezikut për jetën.
Policia e Durrësit është vënë në ndjekje të autorëve, po krihet zona dhe në të gjitha akset rrugore që lidhen me Durrësin janë ngritur pika kontrolli.
Për zbardhjen e ngjarjes është ngritur menjëherë një grup i posaçëm hetimor nga Departamenti i Policisë Kriminale, Prokuroria e Rrethit Gjyqësor Durrës dhe Drejtoria Vendore e Policisë Durrës.
Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112.
LEXO EDHE:
Momenti kur prokurori nxirret nga makina pas atentatit (VIDEO)
“Punon për bandat”/ Çfarë tha Rama për prokurorin Arjan Ndoja
“Far West” në Durrës, shkëmbim zjarri nga dy automjete (DETAJE)
