Thuhet se një nga arsyet se përse qeveritë që taksojnë fort popullatën, bien nga pushteti, është se këto taksa nuk i përkthejnë siç duhet në të mira për qytetarët.
A është ky rasti për qeverinë e Edi Ramës? Ky i fundit krenohet se ka mbledhur shumë të ardhura, por investimet e rëndësishme në vend mungojnë, edhe pse po bëhen gjashtë vite në pushtet.
Pikëpyetje për të ardhurat ka edhe ish-ambasadori amerikan në Tiranë, Aleksandër Arvizu.
“Duhet të them, më duket se ka njëfarë progresi, nëse sheh Tiranën për shembull. Dhe nuk po flas për ndërtimet e reja apo për sheshin e ri… Duken mirë. Por nga ajo që kuptoj, ka procedura më të mira për mbledhjen e taksave, ashtu siç duhet të ketë një vend normal. Në këtë drejtim, është mirë. Sigurisht që ka njerëz që ankohen, por kjo vjen për shkak se tani duhet të paguajnë, ndërsa në të shkuarën nuk e bënin. Pastaj janë reformat e ndryshme. Megjithatë, sipas asaj që mendojnë shumë njerëz me të cilët kam folur, qofshin liberalë, konservativë apo midis, disa thonë se gjërat janë pak më mirë; të tjerë thonë që nuk ka shumë ndryshim, disa thonë është më keq. Sidoqoftë, mbledhja e më tepër taksave është njëra anë. Ana tjetër është ajo çka njerëzit marrin në këmbim. Kjo pjesë për mua është pak e paqartë. Nuk jam në pozitë të them se nuk po marrin asgjë, por nuk e kam të qartë se sa përmirësime ka si rezultat i këtyre fondeve shtesë dhe procedurave më të mira”, tha Arvizu për Albanian Daily News.
