Kryeministri Edi Rama ishte i ashpër edhe me mediat gjatë konferencës së sotme.
I pyetur për përgjimet e Ndraghetas ku përmenden edhe zyrtarë të lartë të qeverisë, Rama sulmoi, krahas opozitës, edhe mediat, të cilët sipas tij po ushqejnë opinionin publik me të pavërteta.
Rama përsëriti disa herë se opozita dhe mediat “duan t’i bëjnë nënën vendit”. Përgjimet e mafies italiane, tha Rama, nuk tregojnë asgjë, pasi sipas tij, Ndragheta arriti të investojë në Tiranë vetëm një dyqan rrobash dhe jo pallate e grataçela.
“Marrja e këtij llumi si ushqim për shqiptarët, netëve të gjata e mejhaneve, televizioneve dhe videove të gjata të kërkesës për klikim dhe spektakël, është një turp. Turp që i mëshiron më së miri ata të cilët i mëshojnë kësaj qasje, ata që priren për t’ia bërë nënën këtij vendi e kanë prioritet. Sa herë që iu jepet mundësia edhe pse s’ka asnjë mundesi në fakt, sepse kjo është një marrëzi e pashoqe. Flasin ca italianë, përmendin njerëz, imagjinojnë investime, parafytyrojnë pushtimin e tokës së premtuar, nuk ka asnjë fakt, asnjë provë, asgjë. Dhe këtu ngrihet një tymnajë që është e neveritshme dhe unë realisht nuk kam asgjë për të thënë për këtë. Mqs më pyetët ju lexova konkluzionet e Prokurorisë italiane, pijini lengun.
Është provë e katandisë së opozitës dhe medias, për t’i hedhur në fytyrë opinionit këtë lloj gjelle kuturbuese, budallallëku dhe poshtërsie. Ça prisni të them? Që as e di se kush janë këta njerëz, që as i kam takuar, kurrë? Është e kotë. Të them që nuk funksionon me ne? Është e kotë. Është një turp, një mënyrë më e ulët sa s’ka, për të kërkuar avantazhe në mexhelis, të natyrës politike, influence etj, për t’ia bërë nënën këtij vendi. Në vend që të bëhet informacion, bëhet dezinformacion, bëhet luftë se kush e shtrembëron më shumë të vërtetën. Dalin disa atye që flasin në telefon në italisht dhe na nxirrni PS të lidhur me Ndragheta. PS-së t’i merrni të keqen“, vijoi kryeministri.
