Agjenti i Paul Pogba, Mino Raiola, ia ka ofruar klientin e tij PSG-së, raporton “Daily Mail”. Mesfushori i Manchester United thuhet se po përgatitet për një largim në merkaton e kësaj vere, sepse marrëdhënia e tij me trajnerin Jose Mourinho është përkeqësuar në sezonin 2017-2018. PSG mund të mos jetë në gjendje ta përballojë financiarisht blerjen e Pogba, për shkak se klubi francez po përballet me akuzat e shkeljes së rregullave të “fair-play financiar” të UEFA-s.
Sidoqoftë, Paul Pogba iu ofrua PSG-së, pasi është zbuluar se Jose Mourinho është gati ta lërë francezin të largohet nga “Old Trafford”, vetëm dy vite pasi mesfushori u kthye te Manchester United nga Juventusi për 89 milionë £. Pep Guardiola zbuloi në fillim të këtij muaji se Raiola ia ofroi Pogba edhe Manchester City, në janar, çka e përforcon lajmin se agjenti i tij ka kontaktuar, gjithashtu, me PSG-në, për mundësinë e një lëvizjeje të verës.
Megjithatë, është e paqartë nëse klubi francez do të jetë në gjendje të nënshkruajë me Pogba, duke qenë se përballet me akuzat për shkelje të rregullave financiare të UEFA-s, pas blerjes së Neymar dhe Kylian Mbappe, për një shumë totale prej 365 milionë £. Real Madridi dhe Barcelona janë dy opsione të tjera, por besohet se ka pasur pak interes për të nga Spanja, deri më tani.
Kjo do të linte City, Chelsea dhe, ndoshta Juventusin, në mesin e klubeve të afta për ta përballuar tarifën e transferimit të Pogba dhe kushtet personale. 25-vjeçari aktualisht fiton më shumë se 200.000 £ në javë, duke përfshirë të drejtat e imazhit. Ai do të marrë një bonus besnikërie prej 3.46 milionë £ këtë verë, plus një rritje page prej 1.875 milionë £, nëse Manchester United kualifikohet për në Ligën e Kampionëve./TeleSport
