Policia e Shtetit ka konfirmuar arrestimin e të shumëkërkuarit, Eldi Dizdari, i cili është prangosur në Dubai. Policia dha sot detajet e para të operacionit ndërkombëtar antidrogë të koduar “Los Blancos” i cili është shtrirë në Shqipëri dhe 9 shtete të tjera si Itali, Belgjikë, Emiratet e Bashkuara Arabe, Gjermani, Greqi, Holandë, Rumani, Hungari dhe Ekuador.
Në pranga kanë rënë jashtë vendit edhe 4 shqiptarë të tjerë. Lek Colaj, 40 vjeç, i cili u arrestua në Rumani; Gjergj Lesaj, 38 vjeç, i cili u arrestua ne Holandë; Sokol Aliko (Memetaj), 36 vjeç, i cili u arrestua në Spanjë; Robert Varga, 44 vjeç, i cili u arrestua në Hungari.
Gjithashtu iu komunikua masa e sigurisë “Arrest në burg” shtetasit Altin Velsula (Hoxha), 36 vjeç, i cili ndodhet në burg në Norvegji.
Eldi Dizdari ishte shpallur në kërkim edhe për përplasjen me armë zjarri në ish-bllok ku mbeti i vrarë Fabjan Gaxha, truproja i Ervis Martinajt si dhe u plagos ky i fundit bashkë me një tjetër. Eldi Dizdari është bashkëshorti i ish-miss Shqipëria dhe modeles, Suada Sherifi.
Karteli më i madh shqiptar i trafikut të kokainës drejtohej nga Dritan Rexhepi, i cili ndodhet i arrestuar në Ekuador, njeriu që porositi pengmarrjen e Jan Prengës, 49-vjeçarit nga Kamza që humbi jetën nga dhuna barbare. Shkak për ngjarjen u bë një ngarkesë kokaine që vëllai i Jan Prengës nuk i kishte dorëzuar kartelit të Dritan Rexhepit në Britaninë e Madhe.
Njoftimi i Policisë
Policia e Shtetit njofton se në vijim të informacionit të dhënë për operacionin mjaft të suksesshëm ndërkombëtar të koduar “LOS BLANCOS”, zhvilluar me homologët ndërkombëtar, si rezultat i të cilit, në Shqipëri, nga ana e strukturave të Policisë së Shtetit u kapën dhe u arrestuan 5 persona, bëjmë me dije se janë ekzekutuar masat e sigurisë “Arrest në burg”, për veprën penale “Pjesëmarrja në organizatë kriminale” edhe për disa shtetas të tjerë, pjesëmarrës të organizatës kriminale, të cilët janë rezidentë jashtë shtetit.
Si rezultat i koordinimit të informacionit mes Policisë së Shtetit dhe policive të përfshira në operacion u bë arrestimi me qëllim ekstradimi drejt Italisë, i shtetasit Denis Matoshi alias Elti Dizdari, 31 vjeç, person me rekorde kriminale të theksuara në fushën e trafikimit të drogave të forta dhe krimeve ndaj personit.
Gjithashtu, si rezultat i bashkëpunimit të Policisë së Shtetit me autoritetet policore italiane, rumune, holandeze, spanjolle dhe hungareze, në kuadër të operacionit “LOS BLANCOS”, u bë u kapja dhe ekzekutimi i masave të sigurisë për shtetasit:
Lek Colaj, 40 vjeç, i cili u arrestua në Rumani;
Gjergj Lesaj, 38 vjeç, i cili u arrestua ne Holandë;
Sokol Aliko (Memetaj), 36 vjeç, i cili u arrestua në Spanjë;
Robert Varga, 44 vjeç, i cili u arrestua në Hungari.
Gjithashtu iu komunikua masa e sigurisë “Arrest në burg” shtetasit Altin Velsula (Hoxha), 36 vjeç, i cili ndodhet në burg në Norvegji.
Policia e Shtetit ka një bashkëpunim solid me partnerët dhe është e angazhuar maksimalisht dhe me profesionalizëm në finalizimin e shumë operacioneve të rëndësishme në kuadër të goditjes së krimit të organizuar dhe trafiqeve të paligjshme që do bëhen prezent në kohën e duhur.
LEXO EDHE:
Arrestohet në Dubai Eldi Dizdari, pjesë e kartelit shqipfolës të kokainës
Shkatërrohet karteli më i madh shqipfolës i kokainës, kush janë shqiptarët e arrestuar (VIDEO)
MAPO siguron emrat, këta janë shqiptarët e arrestuar gjatë operacionit “Los Blancos”
