Policia ka pritur derisa kryebashkiaku i Lushnjes, Fatos Tushe të mbarojë mbledhjen me vartësit, për të ndërhyrë më pas duke prangosur atë dhe 15 zyrtarë të tjerë, me akuzat e korrupsionit dhe shpërdorimit të detyrës.
Me urdhër të SPAK, në zyrën e Tushes kanë mbërritur rreth 30 policë që kanë ushtruar kontrolle, ndërsa punonjësit janë mbyllur nëpër zyrat e tyre dhe nuk i kanë lënë të dalin jashtë institucionit.
Operacioni me urdhër të SPAK është ekzekutuar në orët e para të mëngjesit dhe ka qenë një situatë e pazakontë, kur përpara Bashkisë Lushnje kanë mbërritur automjetet e policisë vendore dhe ata të FNSH.
Efektivët kanë verifikuar dokumentet e firmosura së fundi nga Tushe, ndërkohë që ai është marrë në pyetje në zyrën e tij. SPAK ka kërkuar arrestimin pas dyshimeve dhe hetimeve për korrupsion dhe abuzim me fondet publike. Mësohet se mes të arrestuarve ka ish-zyrtarë dhe biznesmenë.
Ky është rasti i parë që SPAK godet një kryebashkiak. Prokuroria ka të dhëna për abuzime me fondet publike dhe ndaj masa e arrestit me burg janë parë të nevojshme.
Fatos Tushe është mbajtur në ambientet e Bashkisë deri sa është përfunduar kontrolli në zyrën e tij dhe zyrat e funksionarëve të arrestuar. Ai është shoqëruar më pas për në ambientet e Drejtorisë së Policisë, ndërsa personat e tjera janë vendosur në qeli.
