Politika shqiptare ka bërë reagimet e para në rrjetet sociale, ku dënon sulmin rus mbi Ukrainën.
Pas kryemisitrit Rama, i cili i bashkohej qëndrimit të BE dhe NATO-s, ka reaguar edhe presidenti Ilir Meta. Kreu i shtetit thotë se Rusia shkel ligjin ndërkombëtar duke kërcënuar jetën e civilëve të pafajshëm.
“Shqipëria dënon sulmin e pajustifikueshëm të Rusisë ndaj Ukrainës, duke shkelur ligjin ndërkombëtar dhe duke kërcënuar jetën e civilëve të pafajshëm. I bëjmë thirrje Rusisë të tërhiqet nga veprimet ushtarake kundër integritetit territorial dhe sovranitetit të Ukrainës! Shqipëria qëndron me Ukrainën dhe popullin e saj në këtë orë të errët”, shkruan Meta.
Kryetari i PD-së, Lulzim Basha shkruan se agresioni ushtarak i Rusisë është një shkelje e rëndë kundër Ukrainës.
“Ne Partia Demokratike dënojmë ashpër agresionin ushtarak të Rusisë kundër Ukrainës, një shkelje e rëndë e ligjit ndërkombëtar. Ne qëndrojmë pranë popullit të Ukrainës ndërsa ata përballen me kërcënime për jetën e tyre nga agresioni i paprovokuar rus. Ne bëjmë thirrje dhe mbështesim një reagim të shpejtë, të bashkuar dhe të fortë nga OKB, NATO dhe BE kundër ndaj akti lufte kundër lirisë dhe sovranitetit të Ukrainës dhe kundër paqes dhe stabilitetit në Evropë dhe më gjerë”, shkruan Basha
Ministrja e Jashtme, Olta Xhaçka, dënon me forcë sulmin e Rusisë ndaj Ukrainës. Sipas saj, sulmi rrezikon jetën e miliona njerëzve të pafajshëm.
“Shqipëria dënon me forcë sulmin e paprovokuar ushtarak të Rusisë ndaj Ukrainës. Ky sulm rrezikon jetën e miliona njerëzve të pafajshëm, minon themelet e rendit ndërkombëtar dhe shkel Kartën e OKB-së”, shkruan Xhaçka.
