Kryeministri Edi Rama ka paralajmëruar të gjithë ata që kanë ndërtuar pa leje që të marrin masa tani, duke filluar t’i prishin vetë ndërtimet. Nga Shëngjini, ku Rama njoftoi nisjen e aksionit për pastrimin e bregdetit nga informaliteti, kreu i qeverisë u shpreh se të gjithë duhet të mbajnë përgjegjësi.
Kreu i qeverisë kujtoi Kodin Penal, duke thënë se nga inxhinieri tek punëtori i thjeshtë të gjithë janë pjesë e zinxhirit të fajësisë. Ai kërkoi nga qytetarët që të shembin vetë objektet e ndërtuara pa leje si dhe të pastrojnë inertet përpara se të nisë operacioni i Policisë së Shtetit dhe IKMT “Bregdeti Ynë”, duke theksuar se në të kundërt pasojat për shkelësit do të jenë të mëdha.
“Apeli për shkelësit është i thjeshtë: Prishni e pastroni vetë çka keni ndërtuar pa leje në dëm të pasurisë së popullit, sepse kur të përballeni me forcën e operacionit “Bregdeti Ynë”, do të jetë shumë vonë për ju“, u shpreh Rama.
“Javën e ardhshme forcat Policisë së Shtetit dhe Inspektoriatit Kombëtar të Mbrojtjes së Territorit do të nisin operacionin “Bregdeti Ynë”, për të fshirë nga harta e pasurisë më të madhe të popullit shqiptar çdo ndërtim pa leje, duke nisur me ato që janë në proces në thyerje flagrante të Kodit Penal dhe për të çuar përpara drejtësisë çdo shkelës të ligjit (qoftë në krejt zinxhirin e ndërtimit nga investitorët deri tek punonjësit e kantiereve, e qoftë në radhët e vetë policisë, nga shefa e deri tek punonjës, që me veprimet a mosveprimet e tyre kanë lejuar shkeljen e ligjit). Pastrimi i gjithë bregdetit për të vijuar më pas me zonat e mbrojtura e akset kombëtare, do të vazhdojë pa u ndalur deri në goditjen e fundit“, deklaroi kreu i qeverisë.
Ai vijoi: “Është një punë që po zhvillohet me ministrinë e Brendshme, edhe për një arsye tjetër. Operacioni fillon të hënën e ardhshme dhe unë dua që t’ja përcjell këtë mesazh atyre që e dinë vetë që janë në kushtet e shkeljes së rëndë e ligjit. Të lexojnë kodin penal, të marrin masa tani, sepse nga e hëna do të jetë vonë për tju shmangur përballje deri në fund me ligjin. Të lexojnë Kodin Penal se çfarë i pret në momentin kur konstatohet flagranca dhe në momentin kur duhet të ballafaqohen. Të fillojnë t’i prishin vetë, kjo është për t’ju lehtësuar atë që pason.
Unë dua ta bëj të qartë për të gjithë, nga inxhinieri deri tek punëtori më i fundit, me Kodin e ri Penal janë pjesë e zinxhirit të fajësisë. Nuk mund të thuash që unë jam punëtor dhe më morën nuk di ça bëj, sepse është njësoj të thuash që unë jam punëtor, më morën për të transportuar miell, por kishte kokainë.
E treta është që kjo është pasuria më e madhe që zoti i ka dhënë këtij vendi. Ne nuk mund të lëmë që për arsye të situatave të komplikuara, të bubërrojë përsëri nën vështrimin e disa personave, edhe të policisë të fillojë aktiviteti i paligjshëm. Është e pamundur. SHÇBA do t’i shkojë deri në fund, por edhe policia duhet të jetë e informuar se njësoj si lufta kundër krimit, edhe kjo ka një përgjegjësi“, tha ndër të tjera Rama.
KUSH NDËRTON PA LEJE, PASTRON
Sipas ligjit, Rama u shpreh se ata qe kanë ndërtuar pa leje edhe duhet të pastrojnë. “Unë i jap sot një mesazh të gjithë cënuesve të kësaj pasurie. Tërhiquni tani, përfitoni nga këto ditë për të hequr tani ato që keni bërë. Ligji detyron ata që ndërtojnë pa leje edhe të pastrojnë. Kjo gjë shpesh herë është lënë pas dore. Ne nuk do t’i lëmë grumbullimet, por kush nuk do t’i pastrojë vetë, do të paguajë rëndë”, tha Rama.
DO NISE EDHE PASTRIMI NGA NDERTIMET PA LEJE NË RRUGËT NACIONALE
Ministri i Brendshëm, Bledi Çuçi tha se paralelisht me aksionin për pastrimin e bregdetit do të nisë edhe pastrimi nga ndërtimet pa leje në akset nacionale.
“Paralelisht kemi filluar punën për evidentimin e ndërtimeve pa leje që janë bërë në akset rrugore. Është bërë një evidentim i plotë, kemi listën në mënyrë që të fillojmë pastrimin e rrugëve nacionale nga ndërtimet e paligjshme”.
