Çmimi i ujit pritet të rritet sërish. Nëse një konsumator familjar paguan sot nga 20-30 mijë lekë (të vjetra) në muaj do të paguajë akoma më shumë.
Enti Rregullator i Ujit shprehet se ka ende hapësirë për rritje të çmimit të ujit në vend, nisur nga niveli i përballueshmërisë. Kjo është shkruar në raportin vjetor të 2018- ës.
Por si ka shkuar tek kjo ide?
Enti Rregullator i Ujit përdor si referencë të përballimit të pagës së faturës së ujit nga familjet, vlerën prej 5 për qind të të ardhurave të tyre mujore. Duke iu referuar INSTAT-it, llogaritet që një familje ka të ardhura 700 mijë lekë (të vjetra) në muaj. Sipas këtyre llogaritjeve, Enti Rregullator shprehet se ka ende hapësira për rritje.
“ERRU përdor si kriter për përballueshmërinë e pagesës së faturës së shërbimeve Ujësjellës-Kanalizimeve, në nivelin prej 5 për qind të të ardhurave (shpenzimeve) mesatare mujore të një njësie ekonomike familjare, informacion që e përllogarit dhe e publikon INSTAT në “Anketën e Buxhetit të familjes viti 2017″, për të gjitha qarqet e Republikës së Shqipërisë. Këto vlera tregojnë se ka ende hapësirë në drejtim të aftësisë paguese për të përballuar rritjen e tarifave”, thuhet në raport.
Për vitin 2018, Enti Rregullator i Ujit ka miratuar rritjen e tarifave për 8 bashki, të cilat kanë paraqitur aplikimet e tyre, ndërsa është duke shqyrtuar kërkesat e 11 bashkive të tjera.
Një arsye tjetër që po shkohet drejt rritjes së çmimit të ujit është performanca e keqe e Ndërmarrjeve të Ujësjellës Kanalizimeve.
Etiketa: cmimi, enti rregullator, rritet, uji
