Sot është bërë e ditur që pasaporta diplomatike me të cilën janë pajisur lojtarët e Kombëtares tonë të futbollit kanë skaduar, sepse qeveria, më saktë zbulimi i Ramës, i dituri Cakaj paska vendosur kështu në vitin 2019.
Ai që u angazhua të bënte reformë të madhe në shërbimin e jashtëm përplasi grushtin në tavolinë dhe u hoqi këtë privilegj lojtarëve të kombëtares, dhe shefi i tij edhe në ministri edhe në qeveri, e paska mbështetur.
Kur janë pajisur me këtë dokument ekskluziv, afati ka qënë 10 vite. Por kohët e privilegjeve dhe të dashurisë së Edi Ramës me një ekip, një person, apo me disa, variojnë sipas fushatave.
Ndaj ky afat atyre iu ndërpre papritur.
Vendimi për dhënein e pasaportave u mor kur Kryeministri udhëhoqi një fushatë të egër propagandistike, u asociua aq shumë me ekipin, sa dukej se De Biazi ishte mëkëmbës i tij. Aq larg shkoi Rama në përdorimin e lavdisë së kombëtares, sa ngjante sikur u kishte dhënë djemve një kthinë në katin e parë të kryeministrisë si dhomë zhveshjeje.
E u ngjeshën kapitenë e lojtarë pas Ramës pa droje fare.
Ceremoni, nderime, fanfare e tamtame, gjithë vendi e mori vesh se në Europian na dërguan De Biazi me djemtë, po ishte edhe Edi Rama që dha një dorë.
Kjo dashuri e përkohshme i lypsej shefit të rilindjes për zgjedhjet e vitit 2017.
Por ai ka edhe përgjegjësinë për shtetin e reformave. Dhe meqë ka vendosur t’i bëjë ata djem që dikur i shfrytëzonte për imazh të kthejnë dokumentin, një e atillë sjellje kalorsiake e ka pushtuar sërish në dekikë të fundit dhe ka lëshuar një ferman që ata t’i kenë të vlefshme deri në qershor. Pra sërish u ka bërë nder. Le ta mbajnë deri pas zgjedhjeve.
Këtë doli dhe e tha Xhaçka, e cila sikur të mos kishte detyrën që ja kanë dhënë, e meriton shumë më pak se ekipi i kombëtares të mbajë një pasaportë diplomatike. Lojtarët e kanë arritur këtë status me talent e me mund, kurse kjo kryediplomatja që e la Mbrojtjen si sektorin me riskun më të lartë të korrupsionit sipas TI, e gëzon privilegjin për shkak të disa konjukturave partiake. E megjithatë, del e bën sërish si pronare e tagrave dhe privilegjeve të këtij vendi.
Djemtë e kombëtares e meritojnë atë dokument shumë më teppër se gjysma e qeverisë, e drejtorëve, e miqve të kryeministrit. Në fund të fundit më tepër se ata, askush nuk e përfaqëson vendin dhe kombin. E mbi të gjitha, është një lehtësim në qarkullim, në kalim nëpër aeroporte e kufinj, që atyre u lypset, ku e ku më shumë se rilindasve fodullë që e mbajnë diplomatiken për t’u dukur, për t’u veçuar nga qytetarët, për të treguar se i përkasin një klasi tjetër.
Loja e Ramës me to është thjesht produkt i humorit të prishur që ai mund të ketë kohët e fundit me ekipin, me drejtuesit, me federatën. Dhe meqë është pronari, dhe ai e ka topin, e di vetë se si dhe kur e gjuan.
Etiketa: Edi Rama, Fushata, kombëtarja, Pasaportat diplomatike, propaganda
