Arjan Qafa nuk do të ushtrojë me detyrën e gjyqtarit. Komisionit i Pavarur i Kualifikimit vendosi sot shkarkimin e Arjan Qafës si gjyqtar në Gjykatën Administrative të Apelit Tiranë.
Vendimi u komunikua sot për procedurë nga gjyqtarët Valbona Sanxhaktari, Lulzim Hamitaj dhe Pamela Qirko, pasi Qafa nuk ishte i pranishëm në seancë.
Analiza e pasurisë është një ndër tre shtyllat e rivlerësimit për gjyqtarët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar të gjyqtarit Arjan Qafa nga viti 2003 deri në fund të vitit 2017.
Në deklaratën e parë të dorëzuar në vitin 2003, gjyqtari Qafa deklaronte pasuri prej 600 mijë lekësh, ndërsa në fund të vitit 2017, pasuria e tij kap vlerën e 27 milionë lekëve.
Ai zotëron familjarisht pasuri të paluajtshme prej 18.8 milionë lekësh, likujditete bankare prej 2.2 milionë lekësh, kursime në cash prej 1.4 milionë lekësh dhe automjet me vlerë 420 mijë lekë. Në fund të vitit 2017, rezultojnë gjithashtu si huadhënie 4.1 milionë lekë.
Të ardhurat familjare për periudhën deklaruese janë 37.1 milionë lekë, nga të cilat paga nga funksioni zë 41%. Gjyqtari Qafa deklaron gjithashtu 25% të të ardhurave nga pagat e familjarëve dhe 12% e zënë dhuratat në cash.
Ai është përfolur shpesh në media për pasurinë e tij, ndërkohë që në vitin 2014 pati edhe një kallëzim nga Inspektorati i Lartë i Deklarimit e Kontrollit të Pasurive dhe Konfliktit të Interesave (ILDKPKI).
Karriera e Arjan Qafës në sistemin e drejtësisë ka nisur në vitin 1996 si gjyqtar në Bulqizë dhe Dibër. Pas vitit 2010, për katër vite punoi si inspektor në Këshillin e Lartë të Drejtësisë ndërsa më pas u emërua gjyqtar në Gjykatën Administrative të Apelit Tiranë.
