Të tjera detaje kanë dalë në dritë në lidhje me atentatin e ndodhur sot në mbikalimin e Shkozetit, ku iu bë atentat prokurorit të Durrësit Arian Ndoj.
Mësohet se Forca të Ndërhyrjes së Shpejtë nga Tirana kanë mbërritur në Durrës, me automjete të policisë të blinduara. Grupi hetimor i ngritur deri tani ka marrë në shqyrtim pamjet e sigurisë në disa biznese në zonën e plazhit.
Grupi hetimor ka marrë si material pamjet filmike të kamerave të restorantit ku kanë drekuar të tre së bashku, prokurori, shoferi dhe miku i Ndojit, Landi Muharremi i cili njihet ndryshe si Aleksandër Laho. Ata kanë drekuar mesditën e të premtes në një restorant luksoz në zonën e bregdetit.
Mësohet se policia po këqyr pamjet filmike të restorantit, për të parë nëse dikush i kishte ata nën mbikëqyrje.
Bizneseve në rrugën e plazhit iu është kërkuar nga policia të vënë në dipozicion pamjet e kamerave të sigurisë, për të parë se kush i ka ndjekur prokurorin Ndoja dhe dy miqtë e tij nga restoranti deri tek vendi i atentatit. Po ashtu, po merret edhe informacion në terren.
Për llogari të hetimit, janë shoqëruar disa persona nga Durrësi, por pas marrjes në pyetje janë lënë të lirë.
