Një ditë pas protestës për çmimet, Rama njofton bashkëbisedim ‘online’ me shqiptarët. Ashtu siç bën zakonisht kur dëshiron të qetësojë situatë, Rama i fton qytetarët në diskutime.
“Le të dëgjojmë njëri-tjetrin”, shkruan Rama ndërsa takimi virtual do të jetë sot në orën 18:30. Po ashtu, ai thekson se do të flitet për krizën ndërkombëtare të energjisë dhe impaktin e luftës mbi naftën, duke lënë të nënkuptuar se nuk do të ketë asnjë gjë të re, përveçse atyre që ka thënë deri tani.
Kujtojmë se dje mijëra qytetarë protestuan para Kryeministrisë, ndërsa bënë thirrje për uljen e çmimeve të produkteve ushqimore, por edhe të karburantit. Më pas protestuesit bllokuan disa rrugë në Tiranë, ndërsa 16 prej tyre më pas u arrestuan nga policia.
Protesta do të zhvillohet edhe sot, ndërsa qytetarët deklaruan dje se kjo situatë do të vazhdojë deri në ndryshimin e gjërave dhe marrjen e përgjegjësisë nga qeveria.
