Editorial

Pse duhet duartrokitur vendimi i Gjykatës së Durrësit







               Publikuar në : 20:54 - 17/07/19 |
Mapo.al

Mapo.al


Grekët e lashtë preferonin ta shikonin shtetin si një anije, ku secili duhet ta bëjë punën sa më mirë në mënyrë që ajo të shkojë përpara. Ciceroni i referohej madje si një trup njerëzor. Nuk është e rastësishme që ky krahasim vazhdon edhe sot e kësaj dite. Mjafton të shohësh se përse presidentit i referohemi si ‘kreu i shtetit’. Megjithatë më e frikshme nga të gjitha, sipas Ciceronit, është virusi i rrezikshëm që mund të futet në trup. Ky virus po bëhet alarmant këto ditë kur ‘këmba i ra kokës’, me KQZ-në që rrëzoi një dekret presidencial, në kohën kur edhe vetë ODIHR thotë se vendimet e kreut të shtetit i gjykon vetëm Gjykata Kushtetuese. Ky turravrap i qeverisë nuk po ndalet duke iu vërsulur çdo pushteti dhe institucioni në vend, që nga Banka e Shqipërisë, tek Akademia e Shkencave, madje siç vëren një portal në anglisht, duke ndikuar edhe te një organ që duhet të hetojë krimet e komunizmit. Pikërisht në mesin e këtij turravrapi të pashoq në historinë postkomuniste, një gjykatë në Durrës ka marrë një vendim që ka shkaktuar jo pak debat në vend. Asaj i është kërkuar të verifikojë mandatin e kandidates socialiste për kryebashkiake në Durrës dhe ka arritur në përfundimin se votimet e 30 qershorit ishin në shkelje ligjore, pasi një subjekt është regjistruar në mënyrë të parregullt. Vendimi i tyre bazohet po ashtu në një konstatim të misionit vëzhgues të ODIHR.

Gjykatësja që ka marrë vendimin mund të mos jetë e njohur për publikun shqiptar, por ajo na tregon edhe njëherë se përse burokracia është e rëndësishme për sundimin e ligjit në një vend. Me qindra burokratë në mbarë botën kanë kundërshtuar autoritetet më të larta dhe janë trajtuar si heronjtë e heshtur të ligjit. Arsyeja është e thjeshtë: Sundimi i ligjit varet nga zyrtarët që kryejnë detyrat e zakonshme dhe që e njohin mirë punën e tyre. Janë këta burokratë që e dinë se kur shkelen rregullat, janë këta që na imponojnë ligjin çdo sekondë të jetës sonë kudo që ndodhemi. Janë këta themeli i rëndësishëm i një shteti.

Pikërisht këtu nis edhe ndarja. Politikanët janë të interesuar për pushtetin, kurse kjo makineri e burokracisë ka për qëllim të ruajë shtetin. Makutëria dhe babëzia e politikanëve të papërgjegjshëm mund të rrezikojë çdo normë të vendit. Mijëra zyrtarë mund ta ndjekin nga pas këtë babëzi. Por mjafton një rezistencë sado e vogël, për të treguar se këtu ka shenja imuniteti ndaj një virusi që po shemb përdhe gjithçka.

“Në Shqipëri njerëzit kanë mësuar të mbrojnë të pushtetshmin dhe pushtetin, por jo shtetin dhe shqiptarinë”, ankohej para pak ditësh shkrimtari i njohur Kim Mehmeti. Kjo është arsyeja se përse kjo ‘kryengritje’ ndaj pushtetit duhet duartrokitur.


Etiketa: , , , , ,

CLOSE
CLOSE
Pas