Komunikimet e Imzot George Frendos, janë përherë lajm dhe zënë vend në media.
Për shkak të mesazhit, për shkak të kurajos që ka për të thënë gjërat siç ai i mendon, apo për të qënë prezent në kohë të vështira për vendin, dhe sidomos për shkak të ndjeshmërisë që ai tregon ndaj njerëzve, shqetësimeve, halleve të tyre.
Edhe gjatë kohës që u prek nga koronavirusi, Gergo Frendo pati një komunikim të vijueshëm, përmes stafit, ku informohej publiku mbi gjendjen e tij.
Sigurisht, një mënyrë e gjetur kjo për të rritur ndërgjegjësimin tek qytetarët, se covid-19 është prezent, një mënyrë për t’u thënë atyre të bëjnë kujdes.
Në mesazhin që ka shpërndarë këtë pasdite vonë, Frendo, Ipeshkvi i Tiranës dhe Durrësit, ka lajmëruar se do të kthehet së shpejti pranë grigjës së tij, pa të cilën është ndjerë si koka pa trup, dhe se me gjasë, ai do të jenë në shërbim që në javën e parë të Dhjetorit, e po ashtu për datat e rëndësishme të Krishtlindjes.
Po çfarë bie në sy tek përshëndetja që ai ka hedhur në faqen e Facebookut, është se në mesin e njerëzve të shtetit dhe institucioneve që ai falenderon, mungon Kryeministri.
Imzot Frendo është një përzgjedhës i saktë i fjalëve dhe lëvrues ekselent i shqipes. Mungesa e falenderimit për Kryeministrin, nuk besohet të jetë një harresë.
“Dëshiroj të falënderoj shumë nga ata që më kanë uruar shërim të shpejtë, ndër të cilët Presidenti i Republikes z.Ilir Meta, Kryetarin e Kuvendit z.Gramoz Ruci, Kryetarin e Bashkisë z.Erjon Veliaj, z.Lulzim Basha kryetarin e Partisë Demokratike, e shumë e shumë të tjerë!”, shkruan Frendo.
Derisa ai përmend Presidentin, Kryetarin e Kuvendit, Kryetarin e Bashkisë, Kryetarin e Opozitës, të cilët e kanë uruar dhe janë interesuar për shëndetin e tij, atëherë mospërmendja e Ramës në këtë hirearki, dëshmon se shefi i qeverisë, mesa duket është treguar indiferent ndaj këtij rasti, dhe nuk ka treguar ndjeshmëri si të tjerët.
Sigurisht nuk është rasti këtu për spekulim apo për të bërë politikë, por nisur nga e famshmja shprehje biblike, jepi Çezarit, atë që i takon Çezarit, gazeta Mapo e pa me vend të bëjë këtë koment.
LEXO EDHE:
Shërohet nga koronavirusi Arqipeshkvi, George Frendo: Jam gati për Krishtlindjen
