I rikthyer në krye të Partisë Demokratike si pjesë e Rithemelimit, Sali Berisha, është shprehur se nga dy protestat qeveria ka marrë goditjet e duhura, ndërsa për faktin që qeveria nuk është rrëzuar ende, ai tha se as lisi nuk rrëzohet me një të rënë.
Berisha shtoi se kryeministri Edi Rama është duke ndjekur të njëjtën strategji për vjedhjen e zgjedhjeve dhe se për këtë arsye duhet të largohet një orë e më parë.
Berisha tha se beteja e opozitës është “vota e lirë” e cila duhet t’i kthehet qytetarëve. Më tej ai theksoi se kjo betejë nuk ka lidhje me pushtetin e Sali Berishës as dhe me interesat e tij personale, por është një çështje e cila është jetike për shqiptarët. Sipas tij nëse shqiptarët nuk votojnë atëhere ky vend do të marrë fund.
“Edi Rama po vazhdon me të njëjtën strategji dhe taktikë të vjedhjes së zgjedhjeve dhe unë po e ndjek. Unë po e ndjek dhe e konsideroj si një mision më të rëndësishmit që mund të bëhet. Ne duhet ti rikthejmë votën shqiptarëve”.
“Nuk është çështje e pushtetit të Sali Berishës, nuk është çështje interesi, është çështje e jetike e shoqërisë shqiptare. Ose do të votojnë ose do të dizintegrohen totalisht dhe do të marrë fund ky vend, gjë që nuk meriton”, tha Berisha, teksa më tej shtoi se betejat e opozitës për rrëzimin e Edi Ramës do të vazhdojnë.
“Me një të rënë nuk rrëzohet lisi. E ka tronditur (protesta). Unë kam hallin e shqiptarëve të çlirohen nga frika, ndrojtja. Do vazhdohet kjo. Unë shoh Edi Ramën në çdo skemë që ai bën për të grabitur zgjedhjet, opozitën”, theksoi Berisha.
