Gjykata e Krimeve të Rënda ka zbardhur vendimin e plotë me plot 140 faqe për Saimir Tahirin, i cili u dënua me 3.4 vite burg, por që iu konvertua në shërbim prove. Pas shpalljes së vendimit më 19 Shtator, gjykatës iu deshën 40 ditë për të publikuar vendimin e argumentuar.
Kujtojmë se gjykata rrëzoi akuzën e prokurorisë për “grup kriminal” dhe dënoi Tahirin vetëm për “shpërdorim detyre”.
“Në vlerësimin e kësaj gjykate nuk vërtetohet përtej çdo dyshimi të arsyeshëm bashkëpunimi dhe qenia e të pandehurit Saimir Tahiri pjesëmarrës dhe anëtar i këtij grupi kriminal sipas kuptimit të neneve 25 3 26 paragrafi i pestë në lidhje me nenet 28 pika 4 dhe 33/a të Kodit penal”, thuhet në vendim.
Një ndër argumentet kryesore që permend gjykata është mungesa e e informacionit nga Ministria e Mbrojtjes për mosfunksionimin e radarëve që kontrollojnë detin.
Tahiri u shpreh se e ka informuar Minsitrinë e Mbrojtjes, por gjykata thotë se në dosje nuk gjendet një shkresë e tillë.
Mosinformimi i Ministrisë së Mbrojtjes për efektet që sjell mosfunksionimi i radarëve ka ndikuar në rritjen e kriminalitetit për sa i përket trafikut.
“Kjo ka shtrembëruar sundimin e ligjit, ka cënuar shtetin ligjor”, shkruhet në vendimin e gjykatës.
Në vendimin e gjykatës thuhet se kultivimi i bimëve narkotike është e vërtetë që ka përfshirje të punonjësve të policisë, por nuk është i vërtetuar roli i tyre. Gjykata ka argumentuar se duke paraqitur këto prova, rolin që ka pasur secili prej këtyre të pandehurve, akuza për grup të strukturuar kriminal bie poshtë.
Përgjimet që flisnin për dekonspirime nga Policia e Vlorës dhe biseda mes dy vëllezërve Habilaj është rrëzuar me argumentin se nuk mund të merren si provë pasi organi i akuzës nuk ka kryer veprime të mëtejshme për përgjigmet e Habiljave ku flisnin për “shefin e madh”. Prokuroria nuk ka kryer hetime të mjaftueshme për te vertuar se Shefi i Madh ishte Tahiri, thuhet në vendim.
Edhe për dhuratat që pretendohet se ka marrë Tahiri, gjykata ka arsyetuar se Prokuroria nuk ka kryer veprimet e duhura për rolin gjithsecilit. Ndërkohë që akuza e shpërdorimit të detyrës lidhet me mosveprimin e Ministrit të Brendshëm, kur Shqipëria ishte e kanabizuar, por nuk ka vepruar e marrë masa për parandalimin e kultivimit të drogës.
Gjykata për Krime të Rënda përfaqësuar nga Ardit Mustafaj e ka dënuar ish-Ministrin e Brendshëm me dënim plotësues, që për 3 vite nuk duhet të mbajë asnjë post publik.
Më poshtë vendimi i tre gjyqtarëve Flora Hajredinaj, Ardit Mustafaj dhe Irena Gjoka.